Сумар дня на 1. квітня/апріля 2022 р.

Приносиме вам сумар медияльной ґрупы ЛЕМ.фм+ на ден 1. квітня/апріля 2022 р.

Варштаты в Лемківскій Загороді в Ґладышові

Од 15. марця тр. Фундация Лемківска Загорода реализує проєкт пн. «Як ся жыло 100 років назад на Лемковині – варштаты». В рамках проєкту на обшыри Лемківской Загодоры в Ґладышові ведены сут варштаты, направлены головно на діти і молодіж. Темы занять то: лемківскы писанкы, чачка нашых дідів, оборобка зерна і млинарство, лен кормил і облікал, як зробити лжыцю і ґонты та лемківскє ідло. При реализациі дакотрых з тем єст можливіст орґанізациі занять поза Загородом. Варштаты в рамках проєкту будут реализуваны до кінця листопада/новембра тр. Медияльна ґрупа ЛЕМ.фм+ являт ся медияльным патроном проєтку.

Дофінансуваня ремонтів доріг в полудньовій Малопольщы

В минулым тыжни Малопольскій Воєвода Лукаш Кміта підписал з представниками самоурядів з полудня Малопольщы 33 догваріня на дофінансуваня з Урядового Фонду Розвитку Доріг. Умовы сут разом варты понад 66 млн злотых. Серед місцевости, якы отримают дофінансуваня, нашла ся Крениця, яка достане на перебудову ґмінной дорогы неціле півтора мілийона злотых. Дофінансуваный в квоті піл млн злотых буде і ремонт дорогы в ґміні Лужна. Місто Ґорлиці на ремонт доріг достало 1,8 млн. Біч отримал на ремонт дорогы 550 тис., а Устя Рускє 77 тис. злотых. Понад 2,6 млн злотых достал ґорлицкій повіт на ремонты доріг в Высовій і Шымбарку.

Шторічный Лемківско-Погіряньскій Ярмак уж в тот вікенд

Уж в тоту неділю, 3. квітня/апріля, пройде шторічный великодній Лемківско-Погіряньскій Ярмак в Мазярскій Загороді в Лоси. Буде він одкрытый од 10.00 год. Орґанізаторы як все просят цілы родины. Діти будут мочы взяти участ в забавах, варштатах, самодільні зробити великодні прикраскы, писанкы і інчы. Буде мож купити святочне ідло ци розмаіты выробы ручной роботы місцевых артистів. В рамках подіі пройде традицийный турнір битя яєц, буде мож і пообзерати выставу пн. «Писанкы. О символах і традициях» та выслухати концерт ґорлицкого хору Cantores Carvatiani, котрый вызвучыт в лосяньскій церкви о 15.00 год. А о тыжден, в вікенд 9.-10. квітня/апріля на Великодній Кєрмеш просит місто Ґорлиці. Окрем стоіск зо святочным асортиментом буде мож купити кісто – в рамках помочы родині Вальонґів з Ґорлиц. В тот сам вікенд реґіональны продукты, святочне печене, меды, прикраскы і інчы буде мож придбати в рамках скансеновского ярмаку на обшыри Ґалицийского Місточка в Новым Санчы.

Одкрыта солянкова інгалятория в Ґорлицях

В тым тыжни была одкрыта солянкова інгалятория в містным парку в Ґорлицях. На будову обєкту місто достало дофінансуваня з Малопольского Воєвідства в высокости близко 125 тис. злотых. Цілковитый кошт інвестициі то около 360 тис. злотых. Інгалятория вытворює специяльный мікроклимат, збудувана єст з голузок тернины, по котрій тече солянка. Солянкова гмла, яка з того возникат, єст помічна в профіляктиці і при хворотах дыхальных шляків, позвалят выполнити бракы в орґанізмі м.ін. йоду, брому, кальцию ци маґнезу.