Сумар дня на 1. квітня/апріля 2025 р

Приносиме вам сумар медияльной ґрупы ЛЕМ.фм+ на ден 1. квітня/апріля 2025 р.

Высокопреосвященый владыка Йона Максим принял делеґацию Русинів

28. марця Высокопреосвященый владыка Йона Максим, пряшівскій архієпископ і митрополита принял делеґацию Русинів. Стріча з головом Грекокатолицкой Церкви на Словациі была заініцювана Округлым Столом Русинів Словациі. За Русинів участ взяли члены Рады Влады Словацкой Республикы про нацийональны меншыны. Были то Мартін Караш, ведучый Русиньской Оброды на Словациі, Мілян Піліп і Петро Медвід. Присутный был тіж ведучый Церковной комісиі при ОСРС отец Ігор Панчак, котрый репрезентувал Общество святого Йоана Крестителя. В часі стрічы бесідувано о душпастырьскій роботі в парохіях з русиньскым населіньом, хоснуваню русиньскых літургічных тлумачынь ци можливости душпастырской роботы про Русинів в більшых містах і дальшых темах з тым повязаных. Підкрислено тіж стислый звязок Русинів з Церквом. Делеґация єст вдячна Владиці за зрозумліня проблемів і заанґажуваня в іх розвязуваня, надіют тіж, што стріча буде початком дальшой спілпрацы для вірных русиньской нацийональноти.

В Бєщадах порахували жубры

Як передал представник Реґіональной Дирекциі Державных Лісів в Коросні, марцьова інвентаризация вказала, што в Бєщадах прожыват понад 800 жубрів, а іх стада находят ся головні на обшыри надлісництв: Балигород, Тисна, Команча, Ліско, Лютовиска і Ступосяны. Додатково рахуваня потвердило, што популяция од парОх років утримує ся на стабільным рівни. Шторічне рахуваня жубрів єст тіж нагодом, жебы окрислити стан здоровля звірят. Уж од долшого часу науковці занимаючы ся тым ґатунком выражают занепокоіня дост густом популяцийом жыбрів на невеликій обшыри, што вяже ся з хворотами, як і шкодами на орных і лісовых землях.

Што нашлы археологы в Бортным?

Реновация музейной забытковой церкви в Бортным може ся передолжыти. Причыном єст стриманя робіт по тым, як в часі земных прац натрафлено на археолоґічны релікты. Як поінформувал єден з археолоґів, котры тепер ведут досліджыня в Бортным, закля што не хотят здраджати, што нашли коло церкви, ждут на потверджыня. Онедолга вкаже ся більше інформаций, єднак уж тепер мож повісти, што напевно єст то цікаве одкрытя. Ремонт в бортняньскій церкви тырват од грудня/децембра минулого рока. Цілю реконструкциі єст зміцніня конструкциі святыні і однова іконостасу.

Нова думка закінчыня стежкы VELO Біла в Біличні

В січни/януарі Воєвідскій Заряд Доріг в Кракові оголосил конкурс оферт на опрацуваня концепциі роверовой стежкы VELO Біла. Згідні з первістным пляном нова траса буде вела од Тарнова аж до Стружів. Власти Ґміны Устя Рускє надіют єднак, што стежка буде передолжена аж до Біличной, до джерела рікы Біла Тарновска. Як передала війт ґміны Ева Ґарбовска-Ґура, кєд в будучым буде більше грошів, то ґміна буде ся старала взяти до увагы наступный етап будовы роверовой атракциі.

Лемківско-Погіряньскій Великодній Ярмак

Припоминаме, Мазярска Загорода в Лоси уж 15. раз просит на Лемківско-Погіряньскій Великодній Ярмак. Окрем клясичной ярмачной части в проґрамі подіі находят ся додатковы активности – розмаіты варштаты, турнір толчыня яєц, конкурс збераня яєчок для діти, концерт хору Cantores Carvatiani та Співочо-Інструментального Ансамблю Школы в Лоси і выстава плястичных робіт школярів той пляцівкы – «Карпатска розета». Великодній Ярмак в Лоси одбуде ся 6. квітня/апріля вступ платный 2 зл.

фот. Русины на Словакії / Rusíni na Slovensku