Сумар дня на 1. лютого/фебруара 2024 р.

Приносиме вам сумар медияльной ґрупы ЛЕМ.фм+ на ден 1. лютого/фебруара 2024 р.

Лемківскій Річник 2023

Вчера інформували сме о тым, што кінцьом 2023 р. явил ся «Річник Руской Бурсы». Днес заявляме, што так само кінцьом минулого рока вышол «Лемківскій Річник 2023», якій од долгых років выдає Стоваришыня Лемків (перше періодик выходил як «Лемківскій Календар»). Як пише во вступі головный редактор выданя, Севериян Косовскій – річник 2023 є посвяченый 40. річници од І. Лемківской Ватры – Пленеровых Варштатів Ансамблю Пісні і Танця «Лемковина». На окладинці періодика з той нагоды нашла ся знимка трьох «отців» Лемківской Ватры: Петра Трохановского, Володислава Грабана і Ярослава Трохановского. В Річнику найдете спомины з першых Ватр як раз Петра Трохановского, Ярослава Горощака і Андрия Копчы. Є тіж част посвячена дальшій істориі. Севериян Косовскій описал діі Лемківского Союза, Богдан Копча представил результаты Повселюдного Спису на Лемковині в 1921 р., а Даміан Новак описал історию двох панкняньскых церкви. Анна Кырпан традицино написала текст на тему лемківской штукы – тым разом о артисті Богдані Корвачу. «Лемківскій Річник 2023» буде неодолга доступный до придбаня на сайті Стоваришыня Лемків і в дакотрых нашых парохіях.

Вроцлавскы екуменічны богослужыня

В січни/януарі каждого рока проходят в ріжных містах Польщы екуменічны богослужыня, якы стают ся уж традицийом. Того рока вроцлавскы екуменічны стрічы мали завершыня во вроцлавскым православным соборі Різдва Пресвятой Богородиці. Богослужыню проводил владыка Юрий, архієпископ вроцлавско-щеціньскій ПАПЦ. Слово до згромадженых выголосил рикоматолицкій вроцлавскій митрополита, Юзеф Купный. В вечернім богослужыню брали участ вірны ріжных християньскых конфесий, якы мают своі парохіі на обшыри Вроцлавя. Владыка Юрий подякувал митрополиті Купному за щыру проповід. «Наша днешня стріча єст проявом любови до Господа і прошыньом до Него, штобы поміг нам видіти в другым чловеку себе» – бесідувал архієпископ Юрий.

Дальшы капличкы в Малопольщы мажт шансу на ревіталізацию

Заряд Малопольского Воєвідства оголосил дальшу едицию конкурсу для самоурядовых територияльных єдиниц, якы піднимают консерваторскы і реставраторскы роботы при памятковых капличках. Тогорічный буджет конкурсу выносит 700 тис. зл. Уряд інформує, што цілю є захованя для будучых поколінь вартости сакральных обєктів, якы творят культурове богатство Малопольщы. О дофінансуваня можут ся старати тіж особы, на приватных ділянках якых находят ся капличкы – кєд разом з даным самоурядом навяжут в тій справі спілпрацу. Єден внескодавця може зложыти єден внесок. Максимально мож отримати дофінсуваня в сумі 40 тис. зл, але не більше як 60% вшыткых коштів реализациі ремонту. Внескы приниманы будут до 20. лютого/фебруара – до внеску треба предложыти кошторис і фотоґрафіі капличкы. До той поры більше як 720 капличок было выремонтуваных завдякы тому проєктови, в тым капличкы з Лемковины.

Нове получыня Польковиці – Єжманова

Од днес рушат нове автобусове получыня номер 22 медже Польковицями а Єжмановом – інформує ґміна Польковиці. В Єжмановій пасажеры будут мочы пересідати ся на автобус до Ґлоґова. Постанову о покликаню новой автобусовой леніі польковицкы радникы приняли на послідній сесиі. Єдном з причын принятя такого розвязаня был факт, што даякы дотеперішні приватны перевозникы выцофали част своіх услуг з той трасы. Нове получыня буде одкрыте в робочы дни. Сут дві пары получынь – рано і в пополудньовых годинах. Детальну розписку получынь найдете на сайті polkowice.eu.