Сумар дня на 1. марця 2022 р.

Приносиме вам сумар медияльной ґрупы ЛЕМ.фм+ на ден 1. марця 2022 р.

Воєвідскій Систем Координациі Помочы для Украіны

Малопольскій Воєвідскій Уряд поінформувал, што одкрыл Воєвідскій Систем Координациі Помочы для Украіны. До ініциятивы прошено вшыткых старостів і президентів міст. Систем закладат утворіня в каждым з повітів специяльных маґазинів помочы, де можна буде складати дары для жытелів Украіны, котры втікаючы перед войном, прибывают до малопольского воєвідства. Дары будут перше збераны ґмінами, орґанізациями або індивідуальныма особами, а пак перевожены до такого маґазину. Буде він функцийонувал цілу добу, а його задачом буде сеґреґувати, катеґоризувати і пакувати продукты та ділити зобраны річы медже жытелів Украіны, котры сут на обшыри Польщы, як і тых, котры будут перевожены на Украіну. За дистрибуцию дарів одповідала буде Державна Пожарнича Страж. Додатково в рамках ініциятивы урухомлено каналы звязаны з офертами транспорту ци нічлігу. Охочы жытелі Малопольщы, котры можут помочы при транспорті, прошены сут зголошувати ся на адрес transport.ukraina@muw.pl, а заінтересуваны гуманітарном помочом на адрес pomoc.ukraina@muw.pl.

Два евакуацийны потягы поіхают в страну Украіны 

Малопольскій Воєвідскій Уряд додатково зрыхтувал два специяльны евакуацийны потягы до транспорту втікаючых перед войном жытелів Украіны. Склад Малопольской Желізниці жде готовый до выізду в Тарнові. При єдным транспорті може перевезти коло 400 осіб. Для тых, котры по приізді до Польщы не мают ґарантуваного місця, де можут ся затримати, зрыхтувано тымчасовы мешканя. До выкорыстаня сут тіж автобусы, котры рушат, як лем ся вкаже, же буде потреба додатковых курсів. Як передали маршалок і воєвода Малопольщы, хотят вказати реальну підпору і поміч.

Скітуровці можут іздити в Бєщадскым Нацийональным Парку 

Як інформує Бєщадскій Нацийональный Парк, вызначыли трасы до хоснуваня скітуровыма лыжниками. Трасы находят ся на Ветлиньскій і Цариньскій Полонинах, Тарници і Малій Равці. До той поры в цілым парку обовязувал абсолютный заказ того типу спортів. Дирекция парку подає, же на тоту хвилю трасы не сут ознакуваны. Зато апелює, жебы быти розважным, а до хоснуваня новой атракциі заохочат лем досвідченых лыжників. Мапу з трасами треба скорше побрати на ґратя ҐПС, мож тіж сконтактувати ся скорше з бєщадском ґрупом ҐОПР, котра поможе і одповіст на звіданя скітуровців. Парк зазначыл тіж, же зъіздовы трасы не сут типовыма трасами до зъіздів. Треба уважати на выстаючы корені, голузи ци каміня. Дирекция парку просит тіж скітуровців, котры скорыстали з трас, слати своі увагы і пропозициі зліпшыня атракциі на адрес парку.

Серияль про жытя і творчіст Енді Варголя

В сіти появил ся трейлер документального сериялю, котрый оповідал буде про жытя і творчіст Енді Варголя, а тіж про скандалі нюйоркской еліты зламу 60. і 70. років ХХ ст. Продукция посвячена передовому представникови поп-арту явит ся на стрімінґовій плятформі Netflix уж 9. марця. «Денник Енді Варголя» – такій буде наголовок документальной адаптациі приватных записків артисты, посмертні опубликуваных в формі денників. Подля офіцийного опису, серияль зачынат ся, коли в 1968 році стріляют до Енді. Істория Варголя буде оповіджена його голосом, через схоснуваня технолоґіі AI (artificial intelligence). Завдякы згоді Фундациі Енді Варголя в продукциі буде мож почути слова вмерлого в 1987 році артисты. В «Денник Енді Варголя» заанґажуваный был Раян Мерфі, творця такых популярных продукций як «American Horror Story» ци «Glee».