Сумар дня на 1. марця 2024 р.

Приносиме вам сумар медияльной ґрупы ЛЕМ.фм+ на ден 1. марця 2024 р.

Варштаты малюваня полотняных мішків/торб в Рускій Бурсі в Ґорлицях

Уж заран, в суботу 2. марця, в Рускій Бурсі в Ґорлицях пройдут варштаты малюваня акрильовыма фарбами полотняных мішків/торб. Малювати буде мож подля свойой думкы або од зрыхтуваных шаблонів. Варштаты зачнут ся о 12.00 год. То першы занятя в рамках Творчой Бібліотекы – циклю стріч для діти і молодежы, вчас котрых рыхтуваны будут розмаіты ручной роботы артефакты. На другы занятя просиме о місяц, в суботу 6. квітня/апріля, будеме товды робити бібулковы квіткы, такы як давно (або недавно) робили нашы бабы. На Квітну Неділю (за старым календарьом) запрашаме на малюваня писанок традицийном батіковом методом, а о дальшых будеме інформувати в своім часі, будут то м.ін. варштаты ляльок-мотанок ци рыхтуваня традицийных вінців на гробы з сушеного квітя. Інструкторком занять є Олена Дуць. Вступне на вшыткы варштаты дармо – забезпечаме тіж материялы.

Признаны дотациі на ремонтово-консерваторскы працы підкарпатскых забытків

Воєвідскій Уряд Охороны Забытків в Перемышли опубликувал список признаных дотаций на ремонтово-консерваторскы працы підкарпатскых забытків на 2024 р. До уряду вплынуло 296 внесків на дотациі. Квота, котра буде роздиспонувана на ремонтово-консерваторскы працы то 9 млн 392 тис. злотых. Серед обєктів, на ремонт якых признаны были дотациі, сут і тоты лемківскы. Православна парохія в Перегримці отримала дотацию на выміну даху для середущой бані над навом, православна парохія в Щавным на консерваторскы працы конструкциі даху і деревяного стропу, римокатолицка парохія в Близянці на выпосажыня іконостасу і олтар, грекокатолицка парохія в Репеди на продолжыня консерваторскых і реставраторскых прац при поліхроміі олтаря в обшыри копулы – послідній етап. В бывшій грекокатолицкій церкви в Святківці дофінансуваны были консерваторскы і реставраторскы працы при іконостасі. В бывшій грекокатолицкій церкци в Завадці Рыманівскій дофінансувана была технічна і естетична консервация поліхроміі стропу в наві. Полный список дотаций находит ся на вебсайті Воєвідского Уряду Охороны Забытків в Перемышли.

Зміна орґанізациі руху в Польковицях

Ґміна Польковиці інформує о зміні орґанізациі руху, в звязку з поступуючыма працами на улици Пшемысловій. Од 6. марця вылученый з руху буде дальшый одтинок дорогы (медже улицями Кжывом і Колейовом). Дальше закрытый буде одтинок медже улицями Пшемысловом, Домбровского і Польном. Удоступненый зато буде закрытый дотля одтинок медже улицями 3 Мая і Колейовом. Припомнийме, што догваріня обнимат модрнізацию одтинка ул. Пшемысловой долгости близко 2,5 км. Дорога буде зміцнена і пошырена, жебы выділити додатково пас біциґльовой стежкы, котра получыт шахты ”Рудна Головна” і ”Рудна Західня”. Інвестиция єст реализувана в рамках проґраму бургомайстра Польковиц Лукаша Пузнєцкого ”Безпечно на шахту”.

”Стоп пожарам трав”

Рушат інформацийна акция ”Стоп пожарам трав”. Мимо же яр іщы офіцийно ся не зачала, травы уж сут підаляны. Пожарникы на Сандеччыні занотували в лютым/фебруарі уж парунадцет такых підпалінь. Так само скорше як влони мусят реаґувати на підпаляня трав ґорлицкы пожарникы. Підчас акциі ”Стоп пожарам трав” пожарникы будут бесідувати не лем о консеквенциях для чловека, але і природы, м.ін. о тым, же выпаляня травы не зліпшат землі, а лем нищыт місцеву фауну. Акция буде проходила в цілій Польщы.