Сумар дня на 1. вересня/септембра 2021 р.

Приносиме вам сумар медияльной ґрупы ЛЕМ.фм+ на ден 1. вересня/септембра 2021 р.

Противыливовый алярм для ґорлицкого повіту

Вчера рано старостка ґорлицкого повіту Мария Ґубала оголосила противыливовый алярм для цілого повіту. Є то звязане з утримуючыма ся інтенсивныма опадами дощу і фурт погіршаючом ся гыдролоґічном ситуацийом. В урядах ввели цілодобовы телефоны, в готовости сут ратунковы службы. Мельдункы про стан воды в ріках, стан противыливовых насыпів і про загорожены обшыри мают передавати до Повітового Центру Кризисового Заряджаня што штырі годины.

«Підкарпатська Русь: формування національної самосвідомості (1848-1948)»

На выдавничым рынку явила ся книжка проф. Павла Роберта Маґочія про формуваня нацийонального самоусвідомліня на Підкарпатскій Руси. Публикацию печатало Выдавництво Валерия Падяка. Єст то украіньскє тлумачыня публикациі, котра першый раз печатана была в 1978 р. в американьскым Гарварді пн. «The Shaping of а National Identity: Subcarpathian Rus’». Моноґрафія Маґочія зосереджат ся на специфічных особливостях формуваня карпаторусиньской нацийональной ідентичности на Підкарпатскій Руси протягом цілого столітя – од періоду Весны Народів в 1948 р. аж до завершыня ІІ світовой войны, коли Підкарпатя было анектуване Москвом і приєднане до совітской Украіны. Книжку будут презентувати на авторскых стрічах, перша така пройде 2. вересня/септембра в Ужгороді.

Веце автобусів в Польковицях

Вєдно з початком шкільного рока, значыт од днес, Заклад Містной Комунікациі в Польковицях однавлят раннє курсуваня автобусів. До розкладу ізды вертают курсы автобусів з самого рана номер 1 і 3. Згідні з принятыма переписами дармо іздят діти кляс 1-4, котры мают до школы веце як три кілометры, і діти кляс 5-8, якы мают до школы веце як 4 кілометры. Кошт закупу місячного білету є рефундуваный ґміном Польковиці по зложыню одповіднього внеску. Розклад достосували так, жебы школяре могли встигнути на першу лекцию.

Kєрмеш в Чырчы

В вікенд 28. і 29. серпня/авґуста в грекокатолицкій парохіі Чырч прошол архієпархіяльный одпуст. Проґрам завершыл ся архієрейском літургійом, котру одправлял пряшівскій архієпископ митрополита Йоан Бабяк. Хоц хвиля была барз несприятлива, то вірны з околичных сел, але і цілой східньой Словациі зышли ся в великым чыслі на торжествуваню праздника Успенія Пресвятой Богородиці. Праздник окрасили та укріпили своім співом хлопы зо співочой ґрупы «Чірчаньскы говосы».

Театральны стрічы в Новици

Од заране до суботы, 4. вересня/септембра, в Новици буде проходила 14. едиция Театральных Стріч Інновиця 2021. Тридньовый проґрам фестівалю выполненый є предовшыткым театральныма представлінями, в тым для діти, але найти мож і музичны пропозициі ци інчы товаришучы подіі, таки як варштаты малюваня на шклі, лялькарскы, мультімедияльны проєкциі, выставы малярства, фотоґрафіі і інчы. Вступ на подію є дармо, але орґанізаторы просят підперти іх через порталь zrzutka.pl.