Сумар дня на 10. червця/юнія 2020 р.

Приносиме  вам  сумар  медияльной  ґрупы  ЛЕМ.фм+  на ден 10. червця/юнія 2020 р.

30 осіб в кварантанні за перехід границі зо Словацийом

Як подає Карпатскє Одділіня Граничной Стражы, в неділю, 7. червця/юнія, зас трафила ся ситуация, што туристы нелеґальні перекрочыли границю зо Словацийом. Тым разом дошло до того в околици Ізб, в обшыри граничного столпка І/251. Отец з двома сынами вчас біциґльовой прогулькы переіхал на обшыр сусідньой державы, як пояснял, зробили тото нехотячы, помішала ім ся траса, але одраз завернули в страну Польщы. Функцийонеры, котры іх наміряли, направили туристів до Повітовой Коменды Державной Протиогньовой Стражы в Ґорлицях, жебы провести санітарну контролю. Не ствердили підвысшеной температуры в никотрого з роверистів. Опікун достал мандат 300 зл за нелеґальне переходжыня границі (яка – припомнийме – заперта єст з взязку зо станом епідеміі), а всітроє мусят одбыти обовязкову 14-дньову кварантанну. Од початку тымчасового приверніня граничной контролі, малопольскій одтинок державной границі зо Словацийом перешло незгідні з преписами 30 осіб. Вандруючы в приграничній обшыри треба вылучыти ромінґ в телефоні, бо може трафити ся так, што будучы лем близко границі достанеме повідомліня о перекрочыню границі і обовязку кварантанны.

Уж неодолга вкаже ся, што з Санківском Ґеотермійом

Понедільок 8. червця/юнія, был важным дньом для Ґміны Санкова та Міста Ґорлиці. Фірма Exalo Drilling зачала реальне верчыня в земли, жебы провірити, ци плян основаня Санківской Ґеотерміі досправды буде реалізуваный. Зробліня діры глубокой на три тисячы метрів поділили на пару етапів. Зо специялистичных ґеолоґічных досліджынь буде мож окрислити, яка буде температура воды, єй хімічный склад і засобы. Вступны аналізы ґеолоґів і гыдролоґів з Технічного Університету в Кракові сут оптимістичны. Лем же допіро детальны досліджыня потвердят, ци засобы ґеотермальной енерґіі будут одповідні, жебы схоснувати єй огрівати будинкы, або ґеотермальны басены. Ціліст робіт то вартіст веце як 18 млн зл. В більшости фінансує іх Нацийональный Фонд Охороны Середовиска і Водяной Господаркы.

Школа в Баници часово без діти

Директор Онсовной Школы в Баници рішыл о часовым завішыню занять в клясах І-ІІІ той же школы в терміні од 8. до 26. червця/юнія т.р. Обвіщыня, інформуюче про тото, явило ся на офіцийным сайті школы. Рішыня звязане є з протидіяньом пошырюваня ся коронавіруса – родичы, хоц є уж така можніст, не хотят высылати своі діти до школы. Такє само рішыня тыкат ся Предшкільного Пункту в Баници. За тот час едукация ведена буде зо схоснуваньом метод і технік вчыня на одлегліст.

Чергова сенсорична загорода, видокова вежа і інче

На веце як осмох гектарах простору будуют нову туристичну атракцию Погіря. В Тяжковицях, 30 км од Ґорлиц, орґанізуют Здройовый Парк з парома загородами: сенсоричном, скальном, вересовиском і арборетум, медже котрыма будут ся находити басены з водом з сірчковых джерел. Інвестицию выціняют на 22 млн зл. В сусідстві Здройового Парку і Скаменілого Міста хотят вознести тіж стежку в коронах дерев, проблемом є найти выконавцю, котрый змістит ся в плянуваным буджеті. Обі інвестициі мают помочы Тяжковицям здобыти статус курорту. Думка має уж долгу історию, бо санаториі на Погірю близко Скаменілого Міста хотіл збудувати перед стома роками Ігнатий Ян Падеревскій, што товды ся не повело. Одкрытя Здройового Парку планюют на половину 2021 рока.

Фот. Уряд Ґміны Санкова