Сумар дня на 10. червця/юнія 2026 р.

Приносиме вам сумар медияльной ґрупы ЛЕМ.фм+ на ден 10. червця/юнія 2026 р.

Ден Русинів Словациі – святкуваня уж в тот вікенд!

В найблизшый вікенд Меджелабірці станут ся центром русиньского жытя на Словациі. Русиньска Оброда во спілпрацы зо Світовым Конґресом Русинів і інчыма партнерами просят на цілонародне святкуваня Дня Русинів Словациі вєдно з 35. річницьом основаня Світового Конґресу Русинів. Проґрам святкувань зачне ся в пятницю вечер бесідом з участниками першого Конґресу в 1991 році. В суботу одбуде ся конференция присвячена істориі і перспективам русиньского руху, а пополудни містом пройде кройова процесия. Артистичный ґаляпроґрам одбуде ся в містным амфітеатрі. Святкуваня завершыт ся в неділю Божеском Літургійом і засіданьом Світовой Рады Русинів. Орґанізаторы просят вшыткых Русинів і любителів русиньской культуры до спільного святкуваня. Вступне на подіі дармо.

75 років Православной Духовной Семінариі в Польщы

Православна Духовна Семінария в Польщы того рока святкує ювілей 75-літя свого основаня. Головны празднуваня одбыли ся 5. червця/юнія в катедрі св. Мариі Магдалины. Літургію очолювал Його Высокопресвященство Юрий, архієпископ вроцлавскій і щеціньскій в асисті бывшых і актуальных выкладовців семінариі. В молитві брал участ і Блаженнійшый Сава, Митрополита Варшавскій і цілой Польщы та чысленны єрархы і духовны з Польщы і заграниці. Семінария была основана в 1951 році і од того часу неперерывно едукує будучых єгомостів і особы заанґажуваны в жытя Православной Церкви. Підчас подіі підкрислено особливе значыня семінариі – не лем як учельні, але тіж місця духовного формуваня. Были вручены одзначыня для осіб заслуженых в розвиток семінариі, а ректор учельні, о. Юрий Теофілюк отримал право ношыня другого креста з прикрашынями за вельолітню послугу. Ювілей згромадил вельох абсольвентів і приятелів семінариі, підкрисляючы тырваня того місця і його значыня в жытю православія в Польщы.

Буде обводниця Мушыны

Єст зворот в справі будовы другой части обводниці Мушыны. По девятьох роках стараня і формальных перешкід інвестиция отримала зелене світло од Ґенеральной Дирекциі Охороны Середовиска, што в практиці отверат дорогу до того, жебы зачати будову. Нова траса має получыти курорт з граничным переходом в Лелюхові і поправити комунікацийну доступніст реґіону. Як підкрисляют власти міста, обводниця буде важна не лем для Мушыны, але тіж для Крениці і Пивничной. Хоц треба іщы ввести коректы до проєкту – медже інчыма звязаны з охороном перед галасом – адміністрацийне рішыня кінчыт вельолітній процес одкликаня і середовисковых анализ. Першый одтинок обводниці діє од 2013 рока, а другій має дополнити комунікацийный систем цілого реґіону.

В наступным тыжни пройде засіданя передставників меншын

В віторок 16. червця/юнія в Варшаві в Міністерстві Внутрішніх Справ і Адміністрациі одбуде ся 92. засіданя Спільной Комісиі Уряду та Нацийональных і Етнічных Меншын. Стріча зачне ся принятьом протоколів з попередніх стріч. В проґрамі нашли ся м.ін. роботы над принципами набору оферт на задачы реализуваны в 2027 році, котрых цілю єст охорона і розвиток культурной достоменности меншын. Єдным з головных пунктів буде бесіда о плянуваных правных змінах, котры тыкают присутности меншын в публичных медиях. Члены Комісиі будут бесідувати і о можности фінансуваня діянь для меншын з середків Европейской Уніі, в тым проґраму Европейскы Фундушы для Соспільного Розвитку. Стрічу закінчат омовліньом актуальных справ.