Сумар дня на 10. листопада/новембра 2022 р.

Приносиме вам сумар медияльной ґрупы ЛЕМ.фм+ на ден 10. листопада/новембра 2022 р.

Посвятили новый розпис в ґладышівскій церкви

Неділя, 6. листопада/новембра, была для вірных грекокатолицкой парохіі в Ґладышові дньом, коли владыка Євген (Попович), митрополита перемышльско-варшавскій УГКЦ в Польщы, торжественно посвятил новый розпис в середині храму. Архієрейска літургія была повязана з офіцияльным завершыньом малярскых прац, котры – мож речы – были докінчены аж по більше як семох декадах по выгнаню. Припомнути бо треба, што памяткову грекокатолицку церков Вознесіня Господнього в Ґладышові вірны побудували на коротко до ІІ світовой войны і не встигли докінчыти єй інтерєру, што перервала траґічна Акция «Вісла». Окрем пароха, о. Ярослава Чухты, присутны были і другы священникы з поблизкых парохій, в тым бывшый парох Ґладышова о. Павел Сивец, за котрого в 2006 р. был вставленый в церкви іконостас. Вєдно з вірныма молил ся і настоятель римокатолицкой парохіі в Ґладышові. Хоц парохія в Ґладышові чыслит лем десят родин, то і так є єдном з більшых грекокатолицкых парохій в тій части Лемковины. З причыны великых коштів повязаных з выконаньом розпису, перед даякым часом вірны зорґанізували інтернетову збірку фондів.

Словацкы самосправы можут творити меншыновы комісиі

В селах, містах і краях, в котрых творят члены нацийональной меншыны значучый процент в популяциі, самосправа могла бы створити в рамках своіх порадных орґанів і комісию на охорону прав меншын. Такє розвязаня пропонує Ласло Буковскій, полномічный влады Словацкой Республикы про нацийональны меншыны. На Словациі є коло 800 сел і міст, і 6 жуп, в котрых члены нацийональных меншын мают домінуючу або значну позицию. Буковскій звертат увагу нововыбраных представників містных і реґіональных самосправ на тото, же в смыслі обовязуючых переписів істнує можливіст подля потребы зарядити ріжны комісиі як порадны, ініциятивны і контрольны орґаны. Приміром можут быти комісиі, котры будут координувати роботу самосправы з потребами членів меншын. Полномічный рахує на шыршу партиципацию репрезентантів меншын при рішаню справ, котры іт тыкают.

За нами ХV Стрічы Трьох Поколінь

В минулый вікенд в Пшемкові і Шпротаві проходили ювілейны ХV Стрічы Трьох Поколінь з Лемківском Культуром. Подія, яку орґанізує пшемківскій Кружок Стоваришыня Лемків, проходила на фоні 75. річниці Акциі «Вісла». Ансамбль Ярошівяне з Ярошівкы дал концерт, якій был посвяченый споминам на тоту смутну річницю. Ґрупу творят молоды Лемкы вєдно з Андрийом Перегримом. В суботу в Пшемкові вказали ся тіж Ластівчата, якы дали надію своім выступом, і співоча ґрупа Ластівочкы. Наконец запрезентувала ся ґрупа Надія. На другій ден в Шпротаві выступили Ластівчата, а окрем того был гіст – грецкій ансамбль.

В Парку Полонины буде і русиньскій музей

В Нацийональным Парку Полонины зреализує ся тринадцет атракцийных розвитковых проєктів мягкого туризму, з того три під орґанізациями Пряшівского Самосправного Краю. Забезпечат нову техніку про полониньскы роверовы стежкы, розшырят астрономічну обсерваторию о новы павілоны, а Полонины здіґітализуют. В Полонинах так само выникне новый музей, природничный центр, ожывлят ся там ремесла і сохранят лукы. Што основе про Русинів, выбудуваный музей буде музейом русиньской культуры. Як інформувал м.ін. жупан ПСК Мілян Маєрскій, важне є і тото, што вшыткы проєкты принесут робочы місця в секторі мягкого туризму. Проєкты здобыли підпору з ресорту жывотного оточыня і фінансуваны будут з Пляну Одновы і Одольности Словацкой Республикы. Цілковита квота підпоры то близко 8,7 млн евро.