Сумар дня на 10. листопада/новембра 2023 р.

Приносиме вам сумар медияльной ґрупы ЛЕМ.фм+ на ден 10. листопада/новембра 2023 р.

Клясик од Дікенса по русиньскы

Орґанізация молоды.Русины занимат ся ріжныма активностями. В остатнім часі медже них належыт і выдаваня світовой літературы в русиньскым перекладі. Як раз в тых днях з друку вышла книга Чарльса Дікенса «Рождественна коляда». Переклад зо словацкой версиі робила Анна Кузмякова, текст пак был едитуваный і на основі анґлицкого ориґіналу. Новеля, котру написав Дікенс, належыт до літературы, яка традицийно чытат ся перед Різдвом, головно в анґлофонных державах. Книжка по своім выданю такой стала бестселлером. Русиньскє выданя новелі вышло дзеркалово. Значыт, русиньскый текст мож чытати в кодифікуваній ґрафічній системі – кірилицьом, але і латинком, што є выгідне про тых, котры хотят чытати по русиньскы, але не навчыли ся кірилиці. Книжку мож придбати пишучы на prypovidky.mr@rusyny.org, неодолга буде тіж доступна в нашым інтернетовым склепі lem.fm, а так само в склепі rusynshop.sk.

Сценічна оповіст о Русинах

Уж в неділю, 12. листопада/новембра одбуде ся выступліня Фольклорного Ансамблю «Горнад» під назвом «Діла, што ся діют». То авторскє видовиско ансамблю, якє зрыхтувал знаный русиньскій солиста і хореоґрах Штефан Штець. Припомнийме, што видовиско «Діла, што ся діют» першыраз было вказане в 2018 р., бо як раз товды выходила 55. річниця основаня того же ансамблю. То проґрам, котрого основом сут історичны подіі по ІІ світовій войні на териториі Карпатской Руси. Посплітана доля головных героів Русинів, хлопця з Лемковины і дівчатка з Пряшівской Руси, мат вказати на спільне минуле і, як повіл перед пятьома рока для нашой редакциі сам автор, робити єй актуальном і на днес, на час, в котрым жыєме.

В русиньскым музею припомнули Енді Варгола

Вчера в Музею Русиньской Культуры в Пряшові одбыла ся бесіда о жытю і творчости Енді Варгола з директором Музею Модерной Штукы Енді Варгола в Меджелабірцях, Мартіном Цубяком, і зо студентками і професорками Школы Умелецкого Промыслу на улици Водареньска 3 в Пряшові. Як аноснувал русиньскій Музей на своім сайті в сіти Facebook, орґанізаторы мают надію, што директор Музею Енді Варгола вшыткых заінтересувал свойом доповідю,тым більше, што приближыл пару незнаных інформаций о жытю артисты і значыню в поп-арті на світі. Выстава «Од Андрия Вархолы до Andy Warhola i назад» в Музею Русиньской Культуры в Пряшові буде доступна до 15. січня/януара 2024 р.

Тырвают роботы на ул. Промысловій в Польковицях

Тырвают роботы на ул. Промысловій в Польковицях. Як інформує ґміна Польковиці, іщы того тыжня має ся завершыти кладжыня головной бітумічной верствы на одтинку од ул. Полькой до ул. Домбровского, а в будучым тыжни роботы будут проходити на дальшых одтинах. 15. листопада/новембра в тій части Польковиц змінят, згідно з заповідю, ознакуваня руху. Перебудова крижівкы може потырвати до кінця текучого рока. Роботы на ул. Промысловій то єден з пунктів реализуваного проґраму бургомайстра Лукаша Пузнєцкого, маючого на ціли будову доіздвовых доріг до копален пн. «Безпечні на шыхту».