Сумар дня на 10. марця 2021 р.

Приносиме вам сумар медияльной ґрупы ЛЕМ.фм+ на ден 10. марця 2021 р.

Становиско МВСіА про вызнаня шлезского языка

Шлезакы од давна старают ся довести до офіцияльного вызнаня польскыма властями шлезского як окремого, реґіонального языка, якій актуально має лем статус етнолекту. В минулым році в польскым Соймі явил ся проєкт закону, якій бы вызнал шлезскій язык – зложеный членами Гражданьской Коаліциі, Лівиці і Польского Народного Сторонництва. В лютым/фебруарі тр. порозумліня Ślonsko Sztama апелювало о його розсмотріня. Міністерство Внутрішніх Справ і Адміністрациі зрыхтувало становиско, в котрым барз неґативно оцінят вызнаня шлезского языка. Подля власти вызнаня реґіонального языка мало бы ся причынити до заниканя основного польского языка. В писмі чытаме: «Вызнаня істнуваня дальшых діалектів як реґіональных языків могло бы як результат довести до парадоксальной ситуациі, в котрій бы ся соспільство Польской Республикы складало лем з осіб хоснуючых окремы реґіональны языкы без істнуваня основного державного языка». Як інформує ресорт, вызнаня шлезского як реґіонального языка може спричынити подібны жаданя в представників інчых реґіональных ґруп. За примір подают жытелів Вілямовиц, якы так само старают ся о вызнаня іх языка як реґіонального.

Новый ратуш в Мушыні

В Мушыні неодолга одкрыют новый ратуш. Актуально в будинку ведены сут кінцьовы роботы і выпосажыня інтерєру. В обєкті не буде урядників, але саля презначена на выставы і шлюбы. Найде ся там і Центр Туристичной Інформациі ци пияльня мінеральной воды. Забытковы пивниці будут удоступнены для туристів. Як бесідує бургомайстер Мушыны Ян Ґольба, вкажут там м.ін., як давно тримали вина і інчы продукты. Явит ся тіж саля тортур і реконстуувана вязниця. Будинок станул в місци старого ратуша, якій спалил ся в XIX столітю. При будові обєкту ремонтуваный был тіж цілый мушыньскій рынок – змінены были поверх і орґанізация руху, явили ся новы світла, лавкы і рослины. Закінчыня вшыткых робіт єст плянуване на май того рока.

Біч переможцьом конкурсу Польской Туристичной Орґанізациі

Біч занял перше місце в 2. едициі конкурсу «Чекаме на Вас!» орґанізуваного Польском Туристичном Орґанізацийом. Конкурсовом задачом было зрыхтувати фільм долгости од 15 до 30 секунд, якій бы заохочал одвидіти речене місце або обєкт – по закінчыню періоду социяльной ізоляциі. Темом конкурсовой задачы было госло «Чекаме на Вас!». Фільм, якій переміг в конкурсі серед 80 зголошынь, был зрыхтуваный Пунктом Туристичной Інформациі во спілпрацы з Музейом Бічской Землі. Нагородом в конкурсі єст інтернетова промоцийна кампанія в социяльных медиях.

Сенсацийне одкрытя шведской поліциі

Шведскы поліциянты зробили сенсацийне одкрытя в домі контрабандисты наркотиків в Гельсінґборґу. Поліциянты аж тепер вказали, што нашли в його мешканю по затриманю іщы в грудни/децембрі минулого рока. Серед біжутериі, зыґарків, авт ци антиків, якы правдоподібно походят з сериі крадежы в Штокгольмі і околицях, нашли ся там і образы вызначных артистів: Пабльо Пікассо, Марка Шаґаля і Енді Вархоля. Як інформує поліция, актуально провірят ся, ци образы не были вкрадены.

Візуалізация: FB Jan Golba, UM Muszyna