Сумар дня на 10. мая 2022 р.

Приносиме вам сумар медияльной ґрупы ЛЕМ.фм+ на ден 10. мая 2022 р.

Владыка Петро Руснак єст новым апостольскым адміністратором Пряшівской Архієпархіі

В неділю, 8 мая, в Катедральным Соборі святого Йоана Крестителя в Пряшові был інтронізуваный на уряд апостольского адміністратора sede vacante Пряшівской Архієпархіі владыка Петро Руснак, братиславскій єпарха. Як інформувал представник Пряшівской Грекокатолицкой Архієпархіі Михал Павлишынович, торжественна подія зачала ся од прочытаня декрету Конґреґациі про Східні Церкви в Римі. Головным служытельом літургіі был новый апостольскій адміністратор, котрый і проповідал. Вєдно з ним служыли м.ін. бывшый митрополита владыка Йоан Бабяк і владыка Мариян Андрий Пацак. На конец літургіі о. Любомир Петрик, делеґат ad omnia Пряшівской Архієпархіі подякувал владыці Йоанови Бабякови за його єпископску службу. Зречыня ся уряду пряшівского архієпископа і митрополиты Йоана Бабяка папа римскій Франциск принял 25. квітня/апріля тр. Владыка Петро Руснак остал єпархіяльным єпископом Братиславской Єпархіі, і вєдно з тым буде рядил Пряшівском Архієпархійом як апостольскій адміністратор.

Нова думка на вікендову прогульку в Низкым Бескіді

В Низкым Бескіді явила ся нова природничо-едукацийна стежка і новый жолтый шляк. Атракция находит ся в Ожынній, в ґміні Крампна, і была реализувана в рамках проєкту «Розвиток туристичного потенциялу ясельского повіту і окресу Свидник». Цілю атракциі єст вказати туристам, але і жытелям ґміны природничу та культурову спадковину реґіону. Новый шляк і стежка зачынают ся при Едукацийным Еколоґічным Осередку в Ожынній. Жолтый шляк рахує 4 км і лучыт ся зо шляком, котрый веде до Обсерваториі в Розтоках на Словациі. Нова природничо-едикацийна стежка то 12-кілометрова пут, на котрій находит ся 15 пристанків означеных табличками. На них находят ся інформациі на тему флоры і фауны та культуровой спадковины ци історичных подій. Некотры таблиці мают код QR, завдякы котрому мож переслухати дану інформацию в формі авдийо.

В Команчы получыли еколоґію і борбу з залежностями

В суботу, 7. мая, в Новым Лупкові, селі находячым ся в ґміні Команча, прошло спільне саджыня лип в рамках ініциятивы «Спільні для середовиска, спільні для Команчы – проеколоґічны діяня в рамках борбы з залежностями». В стрічы взяли участ ученикы та дирекция з публичной Школы в Новым Лупкові. В часі подіі участникы могли не лем садити два ґатункы липы, але тіж слухати прелекцию на тему овадів беручых участ в запиліню рослин і медоносных рослин. Результатом стрічы сут 2 новы алейкы дерев, єдна веде вздолж дорогы, а друга близко плацу забав.

В Спільні Комісиі Уряду та Нацийональных і Етнічных Меншын буде новый представник росийской меншыны

Спільна Комісия Уряду та Нацийональных і Етнічных Меншын поінформувала о початку процедуры консультуваня змін в складі Комісиі. Зміны звязаны сут з закінчыньом періоду членства представничкы росийской меншыны в Комісиі Ґаліны Травкіны-Сидоренко, Презескы Заряду Стоваришыня Родаків Росиі в Польщы SSR «Galicya». Згідні з записами уставы о нацийональных і етнічных меншынах та реґіональным языку Комісия зачала процедуру вказаня нового кандидата на члена Спільной Комісиі Уряду та Нацийональных і Етнічных Меншын репрезентуючого росийску нацийональну меншыну.

фот. jasło365.pl