Сумар дня на 10. мая 2023 р.

Приносиме вам сумар медияльной ґрупы ЛЕМ.фм+ на ден 10. мая 2023 р.

Прошла матура з лемківского языка

Двоє матуристів підышло того рока до матуры з лемківского языка. Еґзамін з рідного языка прошол в понедільок 8. мая в двох школах – в Ґорлицях, де здавала Магдалина Кузмич, та в Ліґници, де здавал Славомир Стариньскій. Для обоіх был то природный выбір, натуральне наслідствого того, што дома бесідує ся по свому і што од найменшого ходили на занятя лемківского языка в школах. Магдалина Кизмич вышла спід крыл учытельок Варвары Дуць та Монікы Тылявской (обі то выкваліфікуваны педаґожкы, абсольвенткы лемківской філолоґіі на Педаґоґічным Університеті в Кракові), зас Славомира Стариньского до іспыту рыхутвал заслуженый учытель на чужыні Укач Возняк. Вчас тогорічной матуры до выбору были дві темы, перша з них то: «Літературны образы тугы і способы іх креуваня в вершах Штефаніі Трохановской і Івана Желема». Проанализувати і зінтерпретувати вершы «Туга» та «***Уж ся мі не снит» рішыла ся Магдалина. Славомир выбрал другу тему, значыт написати розправку про тото «Што для повыселенчых поколінь Лемків значыт рідна Лемковина?», односячы ся до приведеного тексту «Як не быти бортаком» – фраґменту допису Марты Ватраль та Уршулі Пєчек, што ся тыкат лемківства Северияна Косовского, його постеріганя Акциі «Вісла» і єй наступств. В своіх розважанях матуриста мусіл однести ся іщы до дакого выбраного тексту з лемківской літературы. Ґратулюєме і желаме высокых оцін.

Тым разом о Явірнику

Вказал ся 25. номер часопису «Бєщад», річника печатаного Бєщадскым Одділіньом Товариства Опікы над Памятниками. В найновшыхм номері находит ся м.ін. статя пн. «В басені Ославы. Явірник» авторства Войцєха Веслокіна, котра є уж десятом в сериі. Річник, за словами автора вступу Тадеуша Шевчыка, то історично-краєзнавча публикация, напрявлена і на минуле, часто тіж «оддає голос неприсутным, одходячым культурам, соспільностям». На обшыри Польщы перед войном нацийональны, етнічны, реліґійны меншыны становили веце як 30% населіня, а в Бєщадах было іх іщы веце. В послідніх номерах річника «Бєщад» поміщены были моноґрафіі інчых лемківскых сел спід пера Войцєха Весолкіна, а то м.ін. Щавного, Куляшного, Команчы, Чыстогорбу, Туряньска ци Репеди.

В саноцкым скансені будут готовити лемківскы стравы

Саноцкій Скансен орґанізує дводньове празднуваня Одкрытых Днів Европейскых Фундушів, што пройде в вікенд 13.-14. мая. В оферті Музею Народного Будівництва сут чысленны варштаты, м.ін. ліпліня горців, жыдівской вытинанкы, але тіж і кулінарны показы – в суботу презентувана буде бойківска кухня, а в неділю – лемківска. В пополуднями пройдут музичны концерты. В проґрамі окрем варштатів сут іщы показы роботы гірскых ратівників, будут доступны тіж стоіска з реґіональныма стравами та інформацийны про Европейскы Фундушы. Вступне на подію дармо. Концерты одбудут ся на пленеровій сцені перед Етноґрафічным Парком.

Кычерка в Собині

В суботу 13. мая Дітячый Лемківскій Фольклористичный Ансамбль «Кычерка» запрезентує ся на концерті «Там на Лемковині… в Собині». Родинный концерт зачне ся о 16.00 год. при Римокатолицкій Парохіі св. Михала Архангела в Собині. По концерті орґанізатор, значыт члены ансамблю і іх родиче, просят на огниско і спільну забаву.