Сумар дня на 10. серпня/авґуста 2026 р.

Приносиме вам сумар медияльной ґрупы ЛЕМ.фм+ на ден 10. серпня/авґуста 2026 р.

Вмер Петро Лизанец – вызначный гунґаролоґ русиньского походжыня

В суботу 8. серпня/авґуста, маючы 96 років, вмер Петро Лизанец – професор лінґвістикы, вызначный гунґаролоґ русиньского походжыня. Петро Лизанец родил ся в 1930 р. в селі Ізвор, днес Родниковка на Підкарпатю. Од 1966 рока, аж до 2015 р. был ведучым Катедры Мадярской Філолоґіі на Ужгородскым Державным Університеті. В роках 1977-1984 был тіж деканом Філолоґічного Факультету того же університету. Был директором-основательом Центра Гунґаролоґіі. В році 1995 был удостоєный титулом Заслуженый діятель наукы і технікы Украіны. Окрем інчого Петро Лизанец поважал за важне навернутя історичных назв сел Підкарпатской Руси, котры были змінены (украінізуваны) комуністичным режімом по анексиі і перетворіню краю на област Украіны. Веце о жытю і досягнінях покійного прочытате в дописі на нашым портали. Вічна Йому памят!

Стріча молодых в Сербіі

В минулым тыжни в Бачскій Тополи і Новым Орахові в Сербіі проходила стріча русиньской молодежы, котра выросла як ідея зо Світового Конґресу Русинів. Молоды мали нагоду взяти участ в ріжных активностях, был і культурный проґрам. Подія тырвала три дни. Як інформувал Срдян Ґовля, предсідатель містного одбору Руской Маткы в Новым Орахові, на стрічу пришли молоды Русины не лем з Сербіі, але і з другых держав: Румуніі, Чешской Республикы, Словациі, Украіны і Хорвациі. Было іх разом аж і сімдесятеро. Як подал думкодавця проєкту Дарко Заґорац, цілю стрічы єст плеканя русиньской достоменнтоси, культуры, істориі, традициі, а тіж жебы зосередити ся на познаваню і дружыню. Орґанізаторы выразили надію, што подія буде мала в будучности своі дальшы едициі.

В Здравичным Парку в Высовій будут новы атракциі

Тырват ґрунтовна перебудова Здравичного Парку в Высовій. Однавляны сут найважнійшы обєкты на тым терені – пияльня, амфітеатр і парковы альтаны. Появлят ся тіж цілком новы атракциі для жытелів і курортників. Для діти буде зона руху і едукацийна. Окрем того буде зона выпочынкова і ”пялжова” над потоком. Кошт вшыткых робіт то близко 9,4 млн злотых. Выконавця має час на іх завершыня до будучого рока.

Джерело фотоґрафіі: Радийо-телевізия Войводины РТВ