Сумар дня на 10. січня/януара 2023 р.

Приносиме вам сумар медияльной ґрупы ЛЕМ.фм+ на ден 10. січня/януара 2023 р.

В Музею Народного Будівництва в Саноку пращали бывшого директора

5. січня/януара в Музею Народного Будівництва в Саноку одбыла ся новорічна стріча получена з попращаньом бывшого уж директора той інституциі – Єжы Ґінальского. Подія, яка проходила в конференцийній сали в Ґалицийскым Рынку, зачала ся од подякувань для Ґінальского за тяжку, 23-літню працу, котра принесла многы успіхы і осягніня. Пак лявдацию одчытал новый директор МНБ в Саноку – Марцін Кровяк, якій офіцийно полнит тоту функцию од 3. січня/януара 2023 р. Коротку презентацию пн. «Моі скансеновскы рокы» зрыхтувал і сам Єжы Ґінальскій. Был то фотоґрафічный запис подій, якы проходили протягом послідніх 23 років. Подія закінчыла ся символичным переданьом кєрівництва новому ведучому.

Новый курорт в ґміні Крениця

Тылич отримал статус курорту. Што важне, не єст окремым курортом, але сполнят уж вшыткы вымаганя і єст влученый до стрефы «Ц» Курорту Крениця. Завдякы тому Тылич уникнул зміны назвы, а ціла процедура не мусіла проходити роками. Додатково не будут го обовязвати риґористичны переписы, м.ін. будовляны ци середовисковы. Долучыня до ґрупы курортных місточок вяже ся не лем з новым званьом, але тіж новыма джерелами дофінансувань, інвестициями та пошыріньом тиристичных атракций. Уж тепер в місті находит ся лыжна стация, роверовы пути ци джерела лікуючой воды. В плянах єст будова солянковой інгаляториі і выпочынковой пляжы при потоку Мохначка. Курортне місто може тіж рахувати на більше чысло туристів. Як заповіл бургомайстер Крениці, тепер зачнут ся діяня, што мают на ціли ввести курортны оплаты та зміну статуту курорту.

Мертвый волк в Маґурскым Нацийональным Парку

Kінцьом 2022 рока працівникы Маґурского Нацийонального Парку нашли мертву молоду самицю волка. По вступных досліджынях поінформували полицю, што підозрівают нелеґальне полюваня на звірята на обшыри парку. Справу веде Комісарият Поліциі в Новым Змигороді разом з Повітовом Комендом Поліциі в Яслі, а онедолга правдоподібно до справы долучыт тіж Прокуратор. Тоты звірята сут обняты в Польщы стислом охороном. На обшыри Парку прожыват до парунадцетьох волків. Як підкрислили в своім освідчыню власти Парку, функцийонуваня волків маює великє значыня для правильного діяня природничых процесів і влият на стабільніст приридничых екосистемів. Втрата каждого представника того ґатунку єст величезном втрата не лем для МНП, але і цілых Карпат.

«Лемківскы Кабаты» – малярска выстава в Коросні

Етноцентр Коросняньской Землі просит на выставу інспірувану лемківском культуром «Лемківскы Кабаты». Авторком выставы єст малярка Патриция Дылонґ. Як сама описує свою выставу та інспірацию, захопила ся лемківскым облечыньом, што наштоден єст скромне, а од свята богато здоблене і кольорове. В своіх роботах Дылонґ інспірувала ся особливо кроями для жен. Наголовок выставы «Лемківскы кабаты» навязує до двох першых образів в збірці. Выставу мож видіти до 1. лютого/фебруара. Вступне дармо.