Приносиме вам сумар медияльной ґрупы ЛЕМ.фм+ на ден 10. жолтня/октобра 2019 р.
Проєкциі фільму «Воскресеніє народа» в Братиславі, Пряшові і Ґорлицях
Найновшый фільм од продуцентів Джона Ріґетті і Мариі Сільвестрі під назвом «Воскресеніє народа» мал свою премєру в червци/юнію тр. в Театрі Алексанрда Духновича, а од початку вересня/септембра доступный єст в сервісі YouTube. Тепер інформуєме, што одбудут ся його дальшы публичны проєкциі на Словациі і в Польщы. Першу з них заплянуно на 21. жолтня/октобра в Клюбі Лучниця в Братиславі о 18.00 год. О пару дни, 25. жолтня/октобра проєкция одбуде ся в Пряшові – в Театрі Віоля, так само о 18.00 год. Остатня з проєкций пройде на Лемковині. В суботу, 26. жолтня/октобра, в прострах Руской Бурсы в Ґорлицях о 15.00 год. зачне ся презентация реченого фільму. Вступ на вшыткы проєкциі є дармовый. На каждій зо стріч присутна буде продуцентка Мария Сільвестрі, з котром буде мож бесідувати о фільмі. «Воскресеніє народа» розповідат про тзв. третє русиньскє возроджыня, котре проходило паралельно до падіня комуністичного режіму в середньо-східній Европі, а декотры вважают, што фурт оно продолжат. В фільмі выступуют русиньскы діячы, якы од початку стояли при возроджыню.
50. літя діяльности ансамблю Лемковина зо Львова
Народный Ансамбль Пісні і Танця Лемковина зо Львова рыхтує ся до свого округлого ювілею – 50-літя діяльности. З той нагоды в понедільок, 14. жолтня/октобра 2019 р., в просторах Львівской Нацийональной Фільгармоніі одбуде ся святочна академія. Ювілейный концерт зачне ся о 18.00 год. В проґрамі передвиджено офіцияльны привитаня і выступ ювіляткы – ансамблю Лемковина, котрый лемківску культуру головно серед діаспоры на Украіні підтримує од 1969 р. Хоровый колектив был основаный переселеныма в роках 1940-1945 Лемками, якы нашли ся на обшыри совітской Украіны. Найвекшы успіхы мала Лемковина за часів дириґентуры Івана Кушніра. Ансамбль пошырє лемківску культуру не лем на Украіні, але так само в Польщы. Колектив одвиджал другу Лемковину – з Білянкы, котра плекала культуру Лемків в Польщы. Ювілей м.ін. фінансово підпорила Львівска Державна Областна Адміністрация та Рада Міста Львова.
В Мушыні будуют Тематичны Загороды
В части Мушыны, котра называт ся Запопрадя, тырвают інтенсивны працы звязаны з розбудовом Тематичных Загорід в тым Загорід Любови. Богаты в природу обєкты будут єдном з барже інтересуючых атракций здрою. Ефекты першых робіт уж видно. В парку поставлено статуі грецкых божеств. В найблизшым часі мают быти заінсталюваны фонтанны, лавкы і дальшы зелены елементы. В рамках той ініциятивы місто Мушына хоче побудувати французску, анґлицку і грецку загороду. Має быти і сучасна – модерна. Буде выділена обшыр для ріжных птахів, в тым для пав і бажантів. Про туристів рыхтувана єст алея вздолж берегів Попраду. Тематичны загороды будут ся постійно розбудовувати. В наступных роках мают явити ся байковы загороды про наймолодшых.
Рутенія з проґрамом о оптациях
В найблизшу пятницю, 11. жолтня/октобра, о 19.00 год. в просторах ґімназиі Андрея Сладковича в Баньскій Быстрици фольклорный ансамбль Рутенія представит своє сценічне видовиско – проґрам на тему оптаций Русинів з Чехословациі по ІІ світовій войні на територию совітской Украіны. Представліня Рутеніі то танцювально-драматичный проґрам, в котрым артисты припоминают тоту траґічну історию Русинів. Вступне на концерт то 5 евро.
Коментарі