Сумар дня на 10. жолтня/октобра 2022 р.

Приносиме вам сумар медияльной ґрупы ЛЕМ.фм+ на ден 10. жолтня/октобра 2022 р.

Церков в Бортным номінувана в конкурсі «Забыток задбаный»

Уж в будучым місяци познаме лавреатів і выріжненых в загальнопольскым конкурсі Міністерства Культуры і Нацийональной Спадковины та Ґенерального Консерватора Забытків пн. «Забыток задбаный». Серед номінуваных в конкурсі єст грекокатолицка церков Святых Космы і Даміяна в Бортным, яком заряджат Музей Дворы Карвациянів і Ґладышів в Ґорлицях. Цілю конкурсу єст промоция одповідньой опікы над забытками і пропаґуваня найліпшых взірців консервациі, утриманя і заґаздуваня забытків. В тым році до конкурсу зголошеных было 100 обєктів, з котрых по формальній оціні закваліфікувало ся 88. Зголошыня сут оцінюваны в шестьох катеґориях. В каждій з них, окрем специяльной катеґориі, жырі конкурсу номінує максимально штырі обєкты. Церков в Бортным была номінувана в катеґориі деревяной архітектуры і будівництва. Вручыня нагорід лавреатам і выріжненым в конкурсі пройде підчас торжественной ґалі в листопаді/новембрі тр.

Концерт дедикуваный Марці Мачошковій в Старій Любовни

В віторок, 18. жолтня/октобра, о 18.00 год в Домі Культуры в Старій Любовни одбуде ся концерт пн. «Минули ся моі рочкы, минули». Концерт єст дедикуваный вызначній русиньскій співачці Марці Мачошковій, з нагоды ювілею 80 річниці уродин. Окрем дамы русиньской співанкы запрезентуют ся Мариянна Железна, Штефан Штец, Музика Міляна Рендоша, Фольклорна Ґрупа Варґовчан і Тріо Світковых. Модерувал стрічу буде Йожко Йожка. Вступне платне 15 евро. Орґанізаторами подіі сут м.ін. Русиньска Оброда на Словациі і Місто Стара Любовня.

Вечер русиньскых голосів в Кошыцях

В середу, 19. листопада/новембра, в Кошыцях одбуде ся Вечер русиньскых голосів. В тым році подію зрыхтувало здружыня молоды.Русины во спілпрацы з Редакцийом нацийонального высыланя Радия Патріа, студийо РТВС Кошыці. Концерт, якій буде єдночасно награньом з публиком, одбуде ся в Великым студию РТВС в Кошыцях о 18.00 год. Вечер русиньскых голосів є получыньом русиньской народной співанкы, духовной співанкы і модерной музикы. З народном співанком ся запрезентуют дівчата з Фольклорной ґрупы Полонина під ведіньом Домінікы Новотной, репрезентантом духовной пісні буде Священскій Хор Кошыцкой єпархіі, а з модерном музиком выступит капеля Руснацк´с з Пряшова. Вступне дармо, але треба ся рахувати з ограничынями студия. Концерт буде нагрываный, а пак высыланый 29. жолтня/октобра в ефірі Радия Реґіна. Подію фінансово підтримал Фонд на Підпору Культуры Нацийональных Меншын.

Нова выстава в Музею Русиньской Культуры в Пряшові

Словацкій Нацийональный Музей – Музей Русиньской Культуры в Пряшові зрыхтувал на осін нову експозицию. Выстава «10 років» презентує приміры з остатньой декады творчости представника сучасной візуальной штукы на Словациі, артисты русиньского походжыня Бориса Сіркы. Його творчіст знают не лем дома, але і за границями – в Чешскій Республиці, Фінляндиі, Бельґіі, на Украіні, в Японіі, Тайляндиі ци Швециі. Характерны для його творчости сут темны темы інспіруваны літературныма, фільмовыма мотивами, коміксами або леґендами ріжных культур. Інспірацийом для творчости Сіркы сут часто горрор, істориі з духами, окультизм. Выставу мож видіти в Музею до кінця листопада/новембра тр.