Приносиме Вам сумар медияльной ґрупы ЛЕМ.фм на ден 11. липця/юлия 2019 р.
Уж заран ювілей «Бесіды»
Припоминаме, што уж заран, в пятницю, 12. липця/юлия, святкувати будеме 30-літя часопису «Бесіда» та 35-літя явліня ся першого по войні лемківского часопису «Голос Ватры», якій выходил вчас першых Лемківскых Ватр, а редаґуваный был так само Петром Трохановскым. Торжественный проґрам пройде в конференцийній сали Містецкого Підприємства Комунального Ґаздуваня в Креници. Зачне ся одкрытьом свята, котре вюл буде ведучый Стоваришыня Лемків, Андрий Копча. Дальше, о істориі «Бесіды» і працы над ньом оповіст Петро Трохановскій, головный редактор часопису. Пак буде доповід Марты Ватраль з Ягайлоньского Університету о тым, як «Бесіда» формувала лемківскіст. Выступлят тіж гості і кореспонденты часопису. Буде і артистичный проґрам, в рамках якого выступлят Юлия Дошна, Сусанна та ансамбль Барвінок з Камюнкы. Проґрам закінчыт ся одкрытьом принагідной выставы і свобідном бесідом. Подію орґанізує Головный Заряд Стоваришыня Лемків і редакция часопису «Бесіда», а медияльным партнером ювілею першых повоєнных русиньскых медий в Польщы остає Медияльна Ґрупа ЛЕМ.фм.
Тырват православне поломництво на Святу Гору Явір
Тырват православне поломництво на Святу Гору Явір. Вчера поломникы вышли з Ґорлиц через Білянку до Устя Руского. Тот одтинок поломництва являт ся найдолшым, бо понад 20-кільометровым. Днес вірны путуют до Ганчовы, де в місцевій церкви Покровы Пресятой Богородиці вечером служена буде Всеночна. Заран, по ранных молитвах, поломникы выйдут до Высовы, де при тамтышній православній церкви св. Михала будут витаны єрархы. Заранішній ден є праздником свв. апостолів Петра і Павла. На Святій Горі Ярів вірны православной Церкви вознесут молитвы на ділянці належній Польскій Автокефальній Православній Церкви.
Поломництво грекокатоликів і выстава знимок П. Басалыґы в Чырній
О пару днів зо своім поломництвом выйдут так само вірны грекокатолицкой Церкви. Путуваня зачнут 17. липця/юлия в Креници. Будут іти через Лемковину, селами Мохначка, Чырна, Баниця, Ізбы, як і русиньскыма селами на Пряшівскій Руси, т.є. Фричком, Петровом, Ґабольтовом і Цигельком. Вчера на сайті www.gora-jawor.pl явила ся в лемківскым языку інформация, што в першый ден поломництва в Чырній о 16.00 год. зорґанізувана буде выстава фотоґрафій Петра Басалыґы. Наголовок подіі то «Через священный край – од Чырча по Высову». Знимкы Петра Басалыґу будут споминати на поломницкы місця, так лемківску Гору Явір, як і славне поломницкє місце в Чырчу, котре вірны грекокатолицкой Церкви одвиджают на свято Успіня Пресвятой Богородиці. Выстава буде так само загально споминала на духове богатство Русинів Лемковины і Пряшівщыны. Вчас подіі в Чырній буде доповід Владислава Авґустиньского про взаімны історичны односины Русинів з єдного і другого боку Карпат.
Внет Х Русиньска Ватра на Малым Липнику
Такой о тыжден, в пятницю 19. липця/юлия в Малым Липнику на Пряшівскій Руси зачне ся ювілейна Х Русиньска Ватра, яку орґанізує молодіжне общество Молоды.Русины. Дводньовый богатый проґрам зачне ся од 19.00 год. лекцийом з Катком Бабчаковом, пак концертом Штефана Штеця з гостьом Столичного Дівкы. По ним слідувала буде школа танця, а на конец першого дня забава з народном музиком. Суботній проґрам зачне ся о 14.00 год. церковнославяньском грекокатолицком Божеском Літургійом. Пак зачне ся фольклорный проґрам з наголовком «весіля». О 18.00 год. одбуде ся головный концертовый проґрам – «Вечер русиньскых голосів». Дальше специяльный проґрам ансамблів Рутенія і Горнад пн. «Оптация». Вечером, традицийно для Русиньской Ватры, пройде запаліня великой ватры на поблизкым футбольовым пляци. Завершыньом буде дальша танцувальна забава. Окрем концертового проґраму, Ватрі товаришыти будут другы подіі. Русины з Пряшівщыны красні просят родаків з Лемковины. Вступне на ювілейну ватру то лем 2 евро.
Коментарі