Сумар дня на 11. марця 2021 р.

Приносиме вам сумар медияльной ґрупы ЛЕМ.фм+ на ден 11. марця 2021 р.

На Словациі фурт ся списуют

По третім тыжни од початку повселюдного спису списаных є 58% жытелів Словациі. Найліпшы результаты, што до чысла списаных осіб, має покля што жыліньскій край, де ся уж списало 61,5% люди, найгіршы кошыцкій, в котрым є покля што списаных лем 51,3% жытелів. О частковых даных списуваня інформувала пресова говоркыня Списуваня Жытелів, Домів і Квартелів 2021 Ясміна Стаудер. Што до крайскых міст Словациі, веде Баньска Быстриця з веце як 62% списаных. Головне місто Братислава має списаных близко 60% люди. Медже селами веде русиньскє село Нижня Писана в окресі Свидник. Село, в котрым до кінця 2019 р. жыло лем 81 осіб, евідує уж 94% списаных жытелів. В Польщы Нацийональный Повселюдный Спис має зачати ся 1. квітня/апріля. Покля што тырват активна пролемківска капманія даякых орґанізаций і молодіжных рухів.

Никыфор буде выставлюваный в Кєльцах

Нацийональный Музей в Кєльцях рыхтує ся до двох важных выстав. По планных місяцях спричыненых локдавном рыхтуваны сут выставы прац Никыфора Креницкого і польского артисты Рафала Ольбіньского. Кєлецкій музей завершат і дві великы ремонтово-будівляно-консерваторскы інвестициі. Тырвют уж роботы над выставом посвяченом Ольбіньскому, якій єст єдным з найбарже розпознавальных польскых ґрафіків во світі. А в Музею Діалоґу в Кєльцях буде можна в червци/юнію позерати на выставу посвячену творчости Епифана Дровняка. Як подают робітникы музею, буде то выстава, на котрій вказаны будут розмаіты малюнкы креницкого артисты. Сама выстава має і за ціль приближыти жытелям Кєльц тему Лемків і лемківской культуры.

Остережыня ґорлицкого Санепіду

Ґорлицкій Санепід остерігат перед пробами вкрасти даны жытелів через незнаны підметы. В тых днях Державна Санітарна Інспекция веде епідемійолоґічны інтервю з громадянами. Працівникы Інспекциі ведут телефонічны бесіды з поєдныма особами, котрых даны находят ся в телеінформатичных системах, якы хоснуваны сут згідно з правом. Єднак Санепід остерігат, же сут уж першы ситуациі, што анонімовы особы телефонуют до громадян і просят іх подавати своі даны в ціли нп. добесідувати ся на тест. Вшыткы такы телефоны треба трактувати як пробы вкрасти особовы даны. Ситуациі такы повинны быти зголошуваны як найскорше на поліцию. Ґорлицкій Санепід додає, што анонімовым особам, котры просят подати даны, а не лем іх потвердити, треба одраз одмовити і зголосити справу до одповідніх служб.

Свидник тратит на пандеміі

Місто Свидник оминуло од початку 2021 рока на протипандемічны рішыня і тестуваня на хвороту COVID-19 приблизно 21 тис. евро. Грошы, котры місту має рефундувати словацка держава, хоснуют наприклад на купуваня респіраторів. Свидник є в бордовій зоні на мапі Словациі. Жытелі потрібуют каждых сім днів отримувати результаты антиґенового тесту. Як підчеркнула пріматорка міста, кєд іде про придбаня дальшых респіраторів, місто старат ся іх купувати з дотациі од дежравы, котру Свидник достане на мобільне місце тестуваня. Значыт, же і мобільны місця побераня вымазів будут роблены як найвеце економічно, так жебы місто не мусіло доплачати до остаточных розрахунків. Свидник деклярує і поміч старшым жытелям. Каждый, хто потрібує помочы, може ся звернути до уряду міста, жебы допомочы му купити ідло, гіґієнічны приборы ци лікы.