Приносиме вам сумар медияльной ґрупы ЛЕМ.фм+ на ден 11. марця 2022 р.
Бесіды представників німецкой меншыны з МЕіН неефективны
Як сме перше інформували, Польскій омбудсман Марцін Вьонцек зложыл внесок до премєра Матеуша Моравєцкого, жебы выступил до Рады Міністрів цілю одкликати розпоряджыня Міністра Едукациі і Наукы, якы ограничают вчыня німецкого языка як меншынового. Оцінил іх як дискримінуючы і незгідны з конституцийом та медженародовым правом. Ствердил, же в актуальных обставинах, без заанґажуваня державы і єй інституций, захованя і розвиток культуровой достоменности меншын не буде можливе. Розпоряджыня сут консеквенцийом буджетового закону на текучый рік, якій зменшат част освітовой субвенциі на вчыня языків нацийональных і етнічных меншын о близко 40 млн злотых. Як поінформувал вчера за посередництвом социяльных сіти Рафал Бартек, Ведучый Заряду Социяльно-Культурного Товариства Німців на Опольскым Шлеску, проблем был вчера дискутуваный в Міністерстві Едукациі і Наукы. Стріча не принесла ниякых змін. Тема має быти іщы дискутувана на наступных стрічах.
ECMI прийме дослідників справ меншын з Украіны
Европейскій Центр дс. Меншын (ECMI) подал, же єст готовый приняти науковців і науковых працівників, якы сут біженцями од войны на Украіні. ECMI то медженародный дослідничый центр находячый ся в Німцьох в місті Фленсбурґ, якій занимат ся ріжныма дисциплинами досліджаня меншын в світі. ECMI хоче приняти і спонсорувати науковців з Украіны, якы працуют в шыроко пониманой обшыри справ менышн, тє. досліджаня етнічных і нацийональных меншын вшыткых дисциплин социяльных і гуманістичных наук, м.ін. права, социйолоґіі, політичных наук, етноґрафіі, антрополоґіі, медженародных реляций, культуровых і інчых наук. Дотля дофінансуваня заоферувало пару німецкых інституций. Своі аплікациі можут слати докторанты, особы з докторскым і высшым науковым званьом, як і вызнаны дослідникы. Дрібниці находят ся на офіцияльным вебсайті Центру.
Ремонты доріг в горлицкым повіті
В ґорлицкым повіті штораз більше ремонтів локальных доріг. Рушыли працы при одтинках ґмінных доріг в Лужній. Ремонтуваный буде тіж міст в Мшанці, дорога буде одновлена аж до границі з Быстром. Цілковитый кошт прац то близко 1 млн 900 тис. злотых. Ґміна отримала на тоту ціль дофінансуваня з Польского Ладу. Дофінансуваня ремонтів доріг в высокости аж 95% коштів прац отримала з того самого фундушу ґміна Біч. Цілковитый кошт робіт то близко 10 млн злотых. Ґміна плянує ремонт 22 одтинків долгости разом понад 12 км. До кінця будучого місяця має быти готова документация і оголошеный конкурс оферт.
Выпаляня трав небезпечные для звірят, рослин і люди
Іде яр, а разом з ньом сезон выпаляня трав. В тым році першы пожары в ґорлицкым повіті в результаті підпаліня травы однотували уж в минулым місяци. Як припоминали влони природникы з Маґурского Нацийонального Парку, выпаляня трав має барз неґативы консеквенциі. В часі выпаляня трав гынут звірята, якы жыют і кормлят ся на луках. Выпаляня нищыт тіж верству гумусу в земли, што неґативно влият на рослины. Часто може перейти в пожар, небезпечный для люди і ґаздівок та цінных лісовых і нелісовых екосистемів, кєд же пожар нищыт вшытко на своій дорозі. Аґенция Реструктуризациі і Модернізациі Рільництва припоминат, же жебы мочы ся старати о безпосередні і обшырьовы оплаты, рільникы мусят дотримувати заказу выпаляня рільничых ґрунтів. В примірі його недотриманя Аґенция може наложыти на рільника фінансову кару.