Сумар дня на 11. мая 2022 р.

Приносиме вам сумар медияльной ґрупы ЛЕМ.фм+ на ден 10. мая 2022 р.

Дама русиньской співанкы Марка Мачошкова з президентскым одзначыньом

В неділю, 8. мая, президентка Словациі Зузана Чапутова передавала державны нагороды з нагоды выникнутя Словацкой Республикы. Барз тішыт, што єдном з 25. нагородженых осіб є і перша дама русиньской народной співанкы, а то Марка Мачошкова. Мачошкова отримала Медаль Президента Словацкой Республикы за вызначны заслугы для розвитку Словациі в обшыри культуры. Є то чест не лем для найліпшой русиньской співачкы, але і для вшыткых Русинів, культура котрых была оцінена так высоком нагородом. В святочній церемоніі участ брали і члены Округлого Стола Русинів Словациі – директор театру Александра Духновича Мариян Марко, председа ОСРС Петро Штефаняк, члены Комісиі про Нацийональны Меншыны і Етнічны Ґрупы Петро Медвід і Мілян Ян Піліп, котры нагородженій артистці одраз поґратулювали в імени вшыткых Русинів. Співанкы Мариі Мачошковой од самого початку радия ЛЕМ.фм становлят основу русиньской части музичной базы радия. І мы, як редакторы ЛЕМ.фм, сердечні ґратулюєме.

Купили Варголя за шокуючы грошы

На понедільковій авкциі нюйоркского авкцийного дому Крістіз образ Енді Варголя продали за рекордову ціну – 195 млн дулярів. Знаный образ Мерилин Монро «Shot Sage Blue Marilyn» єст тым самым найдорожше проданым в публичній авкциі твором штукы ХХ ст. Попередні властителі образу, Thomas and Doris Ammann Foundation з Цуріху, хотіли зачати ліцитацию од квоты 200 млн дулярів. Кінцьова ціна, за яку пішол образ, то 195 млн дулярів, што по додатню податку дає як раз близко 200 млн дулярів. Авкция тырвала лем 4 минуты. Рекорд тыкат так само ціны, яку осягнули за Варгольову творчіст. Попереднім было 105 млн дулярів, за якы в 2013 році продали серіґрафіку Варголя пн. «Silver Car Crash». Проданый портерт голивудской звізды кіна є частю выставленой до проданя колекциі Thomas and Doris Ammann Foundation, фундациі названой по Томасі Аммані, приятелю Варголя, та його сестрі Доріс. Грошы з продажы мают піти на благодійны ціли – поміч дітям.

Ніч Музеів в Русиньскым Музею

Як поінформувала нашу редакцию Яна Трущыньска зо Словацкого Нацийонального Музею – Музею Русиньской Культуры в Пряшові, музей і тот рік залучат ся до цілоевропейской подіі Ніч Музеів і Ґалерий, котра є орґанізувана під покровительством Рады Европы. Русиньскый Музей з нагоды Ночы Музеів зрыхтувал на 14. мая цілоденный проґрам – од 12.00 аж до 22.00 год. В рамках того же буде мож видіти не лем постійны выставы музею, але і актуальну часову выставу «Лемкы», котра є присвячена 75. річниці Акціі «Вісла», а в рамках дальшых заплянуваных акций буде мож взяти участ в варштатах орнаменту, послухати выступів двох фольклорных ансамблів – Вородай і Тихопоточан, ци того, як професийный актор Ігор Латта чытат фраґметны русиньской літературы. Дітям на вечер байкы почытат Яна Трущыньска. Закінчыньом проґраму буде концерт знаных ґруп Ролланд і Дівоче Тріо з Чырча.

Запрашаме до бурсяной бібліотекы

В остатніх днях на польскым выдавничым рынку вказала ся публикация пн. «Pod osłoną gór. Dzieje Rusi Karpackiej i Karpatorusinów» авторства проф. Павла Роберта Маґочія. Печатало єй выдавництво Libra PL. Книжка становит досправдове компендиюм знаня о Русинах. Тлумачыня той фундаментальной для історийоґрафіі Карпат моноґрафіі зробил Марек Круль. Польскоязычна версия книхжкы є третьом, при ориґіналі по анґлицкы і тлумачыню на словацкій язык. На другій страні публикациі находит ся дедикация, в якій чытаме, што інспіратором печатаня моноґрафіі Павла Роберта Маґочія в польскым языку был бл. п. Богдан Ґамбаль. Речену книжку можете почытати (або выпожычыти) в бібліотеці Руской Бурсы в Ґорлицях, котра отворена єст од понеділька до пятниці в год. 9.00-15.00 або, по індивідуальным догваріню, в інчым терміні.