Сумар дня на 18. вересня/септембра 2026 р.

Приносиме вам сумар медияльной ґрупы ЛЕМ.фм+ на ден 18. вересня/септембра 2026 р.

ХХХIV Лемкiвска Творча Осiн

Уж в тот вікенд пройде ХХХIV Лемкiвска Творча Осiн. Тогорічна едиция посвячена буде памяти Федора Кузяка, в 100. річницю його народжыня. Першый ден подii (субота) одбуде ся в Бортным – рідным селі маляря, байкаря і соспільного діяча. Початок той части о 17.00 год. в в сельскій світлици. В другiй ден стрiтиме ся – традицийно – в Ґорлицях, в Рускій Бурсі. Недільна част зачне ся о 16.00 год. До участи запрошены сут творці слова з Польщы і Словациі. В артистичній части запрезентуют ся: Ансамбль Терочка і Тімотей Федор з Марийом Марілловом, а тіж Народна Капеля Роберта Гарчара. Головным орґанізатором подіі єст Стоваришыня Лемків, спілорґанізатором – Стоваришыня «Руска Бурса» в Ґорлицях. Сердечно просиме.

Православны торжества в Тыляві

Заран в Тыляві пройдут торжества для упамятніня 100. річниці вертаня Лемків до православія. Божеска Літургія заплянуваня єст на 10.00 годину, очолювал єй буде Його Высокопреосвященство Паісий, архієпископ ґорлицкій і перемышльскій. Припомнийме, што рішыньом Святого Собору Єпископів Польской Автокефальной Православной Церкви, в 2026 р. споминат ся 100. річницю Повороту Лемків до Православія. Протягом рока ювілей споминат ся підчас свят важных для православных Лемків – торжеств на св. Горі Явір, як і недавно на праздник лемківского святого – священномученика Максима, котрого жывот і мученическа смерт была єдным з фундаментів громадных конверсий на Православія. Центряльны святкуваня одбыли ся 5. і 6. вересня/септембра в Ґорлицях, але ювілей святкуваный был і в парохіях на чужыні та другых церквах в Польщы. Заранішнє богослужыня в Тыляві навязує до історичных дій з 1926 р., коли част мешканців перешла з Грекокатолицкой до Православной Церкви. Рух тот был одповідю м.ін. на поступуючу латинізацию обряду і звекшене влияня украіньскых нацийональных нуртів серед грекокатолицкых священників. В черговых роках явиско обняло десяткы лемківскых сел і довело до громадных тзв. повоторів до віры вітців. Торжества мают припомнути о значыню тых подій для реліґійной і нацийональной достоменности Лемків.

Карпато-Америцкій Концерт Камеральной Музикы в Ню Йорку

Заран в Грекокатолицкій Церкви St. Mary на Мангатані в Ню Йорку пройде вынятковый концерт з назвом «Дзвоны Свободы» (Bells of Liberty) ¬ Карпато-Америцкій Концерт Камеральной Музикы. Заграт в ним тріо в складі: Мариюш Мончак (гушлі), Ніколяс Капоняс (фортепіян) і Александер Сальвін (фортепіян). Концерт має презентувати музичный діалоґ медже двома світами. Почути мож буде традицийны народны мелодиі з Карпат і з Польщы, попри американьскых і медженародных клясиках авторства Ґершвіна, Прайса, Борковского і Пяццолі. То черговый раз як русиньскы мелодиі вызвучат на нюйоркскым Мангатані. В маю тр. завдаякы Фундациі Ars Activa на челі з др. Мариюшом Мончаком та Лемко Союзови, «Карпаторусиньску Рапсодию», в тым чыслі лемківску народну і авторску музику, мож было почути в Carnegie Hall – нюйоркскій концертовій гали, єдній з найбільше престіжных во світі.

4. Лемківскє Співаня в Высокым

Уж заран в селі Высокє в ґміні Рудна одбуде ся 4. Лемківскє Співаня. Подія зачне ся о 14.00 год. Перед концертом ансамблі перейдут в святочным короводі. Выступлят: Лемківскій Ансамбль Пісні і Танця Кычера, Лемчата, Лемківскій Фольклорный Ансамбль Розтока, Захента з Зимной Воды, Фольклорный Ансамбль Сасанка, Оркєстра Святого Миколая, Коняре і Демай. В рамках додаткового проґраму зрыхтувано простір штукы, варштаты і зону для діти.