Сумар дня на 11. серпня/авґуста 2020 р.

Приносиме вам сумар медияльной ґрупы ЛЕМ.фм+ на ден 11. серпня/авґуста 2020 р.

Проблемы з продолжаньом засіданя Рады Ґорлицкого Повіту

Повітове Староство в Ґорлицях помістило на своім сайті освідчыня заступці ведучого Рады Ґорлицкого Повіту Яна Мораньды в імени 13 радників в справі параліжу роботы Рады Повіту, выкликаного зорваном сесийом в дни 28. мая тр. Засіданя зорвал товды ведучый Рады Мирослав Вальонґ з партиі Право і Справедливіст, зато што решта радників хотіла го з той функциі одкликати. Рішыня перервы в засіданю пояснил правныма вантпливостями. Не схоснувал можливости взяти опінію присутных двох правных радців з готовым узасадніньом. Третій місяц забльокуваны сут діяня Рады Повіту, понеже ведучый Вальонґ фурт бльокує продолжыня засіданя. Рада Повіту уж парократ звертала ся з прошыньом продолжыти засіданя, што ведучый Вальонґ фурт іґнорує. Радный Мораньда в писмі пояснят, што до правильного фунґуваня цілого староства необхідне є дальше засіданя. Рішыти треба м.ін. фунґуваня єдиной в цілым повіті цілодобовой аптыкы. Окрем того, Рада Повіту повинна провірити економічну ситуацию ґорлицкого шпыталя ци провести публичну дебату над рапортом про стан повіту. Неодолга радникы повинны заняти ся і дальшом необхідном справом, значыт – схваліньом буджету на 2021 рік. Писмо кінчыт апельом до ведучого Вальонґа о як найскорше обновліня засіданя Рады Повіту.

Персеіды з Персею зіманы над русиньскым небом

Державный Iнститут про Літаня і Космос (NASA) 10. серпня/авґуста припомнул про шторічный космічный театр в виді падаючых звізд – рою Персеідів, через поміщыня тзв. фотоґрафіі дня. Там же явила ся вчера знимка, котра походит з Колоницкого Сідла в Полонинах, де находит ся обсерватория. Автор знимкы, Петр Горалек, інформувал, што фотоґрафію Персеіды з Персею зробил в ночы з 9. на 10. серпня/авґуста 2018 рока, але два рокы прошло на обрабляню знимкы. До опрацуваня фотоґрафіі велику ролю одограла математика і опрацуваня діґітальных даных та калібрацийной роботы. Знимка вказує метеоритну мозаіку поскладану з семох окремых фотоґрафій і є мультіекспозицийным представліньом цілонічной панорамы. Мож на ній видіти 407 метеорів з рою Персеідів. Того рока найвекша активніст падаючых звізд астрономы ждут днес вночы. Астрономічна обсерватория на Колоницькым Сідлі находит ся на териториі Парку Темного Неба медже русиньскыма селами Колониця і Ладомирів. Є робочым місцьом Выгорлятской Звіздарні.

Джаред Лето як Енді Варголь

Перед парома днями, 6. серпня/авґуста, проходила річниця народин Енді Варголя, котрым гордит ся русиньскій світ. В тот же ден на своім інстаґрамовым конті Джаред Лето оголосил, што буде він грал самого Енді в біоґрафічным фільмі про артисту. Написал тіж, што є вдячный і підексцитуваный з той нагоды. Лето, котрый был м.ін. Джокером в фільмі «The Suicide Squad», буде найпевнійше і продуцентом образу. На разі не знатя, на коли плянувана є премєра фільму. Нова біоґрафічна продукция про Варголя то правдоподібні тот сам проєкт, в котрый Лето мал быти заанґажуваный в 2016 році. Наголовок проєкту то «Варголь», опертый є він на книжці Віктора Бокріса «Warhol: The Biography», а заадапутвый через сценаристу «The Wolf of Wall Street» Теренса Вінтера. Актор Джаред Лето знаный є з того, што знат драматичні зміняти ся для ролі, жебы тота набрала характеру. В фільмі «Dallas Buyers Club» вошол з ролю транссексуальной жены зараженой вірусом HIV і узалежненом од наркотиків. Признали му за ню нагороду Оскара.

Польковиці на добрій дорозі до зменшаня кількости бетоновых пляців

Польковиці будут ся зеленити і одбетонувати. Зелена алейка з деревами стане на польковицкым рынку, буде не лем прикрашала, але і холодила бетоновый пляц. «Зелена алейка» вписує ся в діяня ґміны, тыкаючы звекшыня кількости засадженых дерев. Лукаш Пузьнєцкій, бургомайстер Польковиц, бесідує, што того рока посадят веце як 700 дерев на обшыри ґміны. Додає, што цілю діянь є творити затінены місця, де бы мож было одпочнути і ліквідувати тзв. містецкы островы тепла. Част брукуваной косткы заступит пят дерев з роду плятановців – то листяты дерева о грубым пени і розложыстых галузях. «Зелена алейка» то крок до того, жебы ґміна Польковиці стала ся зеленыма ключами Мідьового Басену.