Сумар дня на 11. серпня/авґуста 2021 р.

Приносиме вам сумар медияльной ґрупы ЛЕМ.фм+ на ден 11. серпня/авґуста 2021 р.

Небезпечны одпады скорше зникнут з обшыри Ґорлиц

Скорше, як первістні закладали, закінчыт ся вывезіня токсичных одпадів з обшыри бывшой рафінериі нафты Ґлімар в Ґорлицях. Фірма, котра выграла конкурс оферт, жебы вывезти 5 тис. тон хімікалий, мала тото зробити до кінця рока. На тот момент вывезеных є уж веце як 80 процентів одпадів. Выштко має ся закінчыти на зламі вересня/септембра і жолтня/октобра. Дальшым етапом буде інвентаризация, ци вшытко было вывезене. Особами одповідальныма за складуваня небезпечных токсин на терені Ґлімару заняла ся прокуратура. Кошт вывозу одпадів то 50 млн зл. 40 млн зл походит з дотациі з Нацийонального Фундушу Охороны Середовиска і Водной Господаркы. Решта буде покрыта з пожычкы од Воєвідского Фундушу Охороны Середовиска.

Грекокатоликы рыхтуют ся на візиту Папы Франциска

6. серпня/авґуста тр., на свято Преображыня за григорияньскым календарьом, грекокатолицкы вірны на Словациі зачали духовну приправу перед візитом Святішого Отця Франциска в Пряшові. Приправа буде тырвала 40 дни, скінчыт ся, коли папа римскій одслужыт Божеску Літургію св. Йоана Златоустого в Пряшові на праздник Воздвижыня Честного Креста дня 14. вересня/септембра. Папа Франциск в днях од 12. до 15. вересня/септембра буде з візитом в Братиславі, Кошыцях, Пряшові і Шаштіні. Стрітит ся з трьома найвысшыма конституцийныма діячами, з представниками християньскых церкви, з представниками Жыдівской Реліґійной Спільности і з ромском комунітом. В Пряшові буде мал стрічу з грекокатоликами, де одслужыт літургію і буде проповідал.

Інформацийны материялы, што мож робити

Полномічный влады Словацкой Республикы про нацийональны меншыны Ласло Буковскій вєдно зо своім тімом зрыхтували інформацийны материялы, котры приближают повинности самосправ при публикуваню інформаций в языку нацийональной меншыны. Материялы приготовлены сут окрем по словацкы, іщы по мадярскы, украіньскы і по русиньскы. Уряд хоче іх пошырювати до сел і міст, додатково – хоче, жебы публикуваны были в видным місци і активні пропаґували меншыновы права, котры дає языковый закон.

Кулінарна Книга Ґуралів Світа і вельо інчого

Заран стартує 52. едиция Медженародного Фестівалю Фольклору Гірскых Земель в Закопаным. Ансамблі з Польщы і Европы запрезентуют свою спадковину, традициі, обряды, звыкы. Того рока головном темом, довкола котрой будe обертал ся фестіваль, є госло: од снопка до таніра. Будут кулінариі, традициі і пісні звязаны з роботом в поли. Заміріньом є вказати через выступы ансамблів, як то выглядало од моменту, коли чловек посіял, засадил, до хвилі, коли міг сконсумувати плоды природы. Подійом тогорічной едициі буде показ Кулінарной Книгы Ґуралів Світа, в котрій зобрали парудесят рецептур од фестівальовых гостів і ансамблів. Протягом 50 років в Медженародным Фестівали Фольклору Гірскых Земель участ брало близко 600 ансамблів з парудесятьох держав і веце як 200 ґруп з Польщы.