Сумар дня на 11. серпня/авґуста 2023 р.

Приносиме вам сумар медияльной ґрупы ЛЕМ.фм+ на ден 11. серпня/авґуста 2023 р.

Награйте фільмік і выграйте чытник KINDLE

До 30. вересня/септембра можете взяти участ в нашым конкурсі, в котрым сут до выграня чытникы до книжок маркы KINDLE. Старчыт награти короткій фільмик і помістити го на дакій плятформі социяльных медий в формі посту. В фільмі треба помістити три слова: Лемковина, шковраночок, Мурянка. До того фільмік треба отаґувати: #RuskaBursa #LemFm #AmazonPomagamy. Выгрыват тот автор, фільм котрого здобуде найвеце высвітлінь. Наймолодшы будут мати нагоду выграти чытникы в другым конкурсі, в котрым для тых самых госел треба намалювати образок свобідном техніком і прислати до Руской Бурсы. Деталі конкурсу чытайте в дописі на нашым портали.

Лемківскій вікенд в Радваницях

В Радваницях на Нижнім Шлеску тырват «Літня академія лемківской культуры», яку орґанізує Дом Культуры в Радваницях. Дотля мож было в рамках акциі выслухати прелекцию пн. «Лемкы сут серед нас», і взяти участ в кулінарній стрічы. Днешня стріча тыкат малюваня батіком. Заран, в суботу 12. серпня/авґуста на пляци при Ремізі Охотничной Пожарничой Стражы в Радваницях одбуде ся інтеґрацийне огниско з танцями і лемківском музиком. Академію завершыт в неділю концерт лемківского Ансамблю Пісні і Танця «Ластівочка». Концерт зачне ся о 17.00 год.

30 років спілпрацы осередків Словацкого і Польского Статистичных Урядів

Як поінформувало Стоваришыня Карпатскій Еврореґіон Польща, в минулый віторок в замісцевым бюрі Словацкого Статистичного Уряду в Бардийові одбыла ся робоча нарада тыкаюча будовы архітектуры інформацийного систему Карпатского Еврореґіону. В присутности директорів Статистичных Урядів в Ряшові Марка Цєрпяла-Воляна і в Пряшові Яна Коцона та заступці бургомайстра Бардийова Петера Петруша были бесідуваны оптимальны розвязаня для Трансграничных Функцийональных Обшыри і Маркы Carpathia. Як подали, 30-річнна спілпраца обох статистичных осередків єст ґаранцийом зрозумліня і професийного спертя політикы Еврореґіону. При нагоді омовлено компонент Карпатской Обсерваториі в прирыхтуваным проєкті Інтерреґ PLSK.

На «Іменинах Улиці Найсвятійшой Мариі Дівы» в Ліґници выступлят лемківскы ансамблі

В Ліґници в другій вікенд вересня/септембра, т.є. 9. і 10., одбуде ся подія пн. «Іменины Улиці Найсвятійшой Мариі Дівы», котру орґанізує Ліґницкій Центр Культуры. Звіздами підчас двох вечерів будут знана польска вокалистка Наталия Кукульска і лемківска ґрупа Надія. Окрем того в часі імпрезы на сцені выступлят і локальны артисты, фольклорны ансамблі, Михал Щыґєл, а тіж Ансамблі Пісні і Танця – Ліґниця і лемківска Кычера. Окрем концертів в проґрамі подіі сут спектакль для діти, показы і другы атракциі.

Рослина уважана за вымерлу од 100 років росне коло Ославиці

На луці коло Ославиці біоложка Йолянта Гарна нашла рослину, яка од близко 100 років была уважана за вымерлу. Чеснок гребінчатый то ґатунок, для якого натуральном обшырю выступуваня єст Европа і західна Турция. В Польщы был стрічаный близко 100 років тому, бо в 1924 році в резерваті Бєлінек над Одром, але і там зникнул. До недавна думали, же цілковито выгынул на обшыри Польщы. Находит ся на Червеным списі рослин і грибів Польщы і Польскій Червеній Книзі Рослин. На списку в выданю з 2016 рока має катеґорию РЕ (вымерлый в обшыри Польшы). Рослину в 2017 р. нашли в місті Торунь, але припадок тот был вызнаный як антропоморфічне становиско, т.є. принесли єй там люде. Зато рослина, котру нашла жытелька Команчы на луці коло Ославиці, здає ся – выступує там на натуральным становиску. Одкрытя свідчыт о тым, же росилна, хоц од давна узнавана за вымерлу, єднак ся там заховала.