Сумар дня на 11. серпня/авґуста 2026 р.

Приносиме вам сумар медияльной ґрупы ЛЕМ.фм+ на ден 11. серпня/авґуста 2026 р.

Ци Климківскє озеро высохне?

Климківскє озеро в Низкым Бескиді од близко двох років має штораз менше воды. В послідніх тыжнях, в звязку з высокыма температурами і слабым приплывом воды, велика част озера цілком высохла. В выжній части, коло Устя Руского, на мiсци воды днес є лука, через котру протікат лем узкє корыто Ропы. Є то місце, в котрым іщы два-три рокы тому люде могли ся купати. Причыном проблемів є не лем посуха. Підчас низкого стану воды до Климківкы входит около 0,5 м³ воды на секунду, в тым часі запора мусит выпущати мінімальнi 2 м³ на секунду. В результаті озеро може тратити около 130 тисячів м³ воды денні. Такы правила были введены в 90 роках XX ст. і до днес ся не змінили. Низкій рівен воды влият тіж на туристику і локальну економію. Над заливом є штораз менше рыбаків і осіб хоснуючых купалиско, а властителі нічліговых обєктів бесідуют о меншым iнтересі туристів. Самоурядовці і локальны бізнесмены хотят зміны правила господаруваня водом. Ма быти приготовлена гыдролоґічна експертиза, котра окрислит, ци можливе є ограничыня спущаня воды без неґативных наслідсвт для рікы Ропы і теренів положеных ниже запоры.

«Музика Заклята в Деревi» – Шляком Деревяной Архітектуры в Малопольщы

В днях 26.–30. серпня/авґуста в забытковых деревяных обєктах Низкого і Сандецкого Бескідів одбуде ся фестіваль «Музика Заклята в Деревi». Концерты будут орґанізуваны м.ін. в церквах в Квятони і Верхомли Великій, в Мазярскій Загороді в Лоси, при костелі в Санковій та в амфітеатрі в Высовій. В проґрамі подіі нашли ся артисты, якы репрезентуют ріжны музичны ґатункы – од музикы інспіруваной традицийом Карпат і фольклором по сучасну альтернативну музику і поп. Фестіваль отворит Вернигора, а підчас дальшых дни выступлят м.ін. Войтек Шуманьскiй, Туля і VOŁOSI. Подіі товаришыти будут тіж варштаты ремесла, презентациі реґіональных страв, деґустациі локальных продуктів і зiля. Кажда з подій має быти нагодом познати выняткове дідитцтво Шляку Деревяной Архітектуры в Малопольщы. Вшыткы концерты сут безплатны.

Фестiвлi в серпни – Карпаты OFFer i Фестіваль Фольклору Гірскых Земель

В вiкенд 14.–16. серпня/авґуста в Новым Санчы одбуде ся 15. едиция Медженародного Мультiмедияльного Фестівалю Штукы – «Малопольща Карпаты OFFer 2026». Подія лучыт традицийну культуру Карпат з модерныма формами штукы, творячы простір стрічы фольклору з музиком, театром, танцьом, фільмом і візуальныма штуками. В проґрамі нашли ся концерты артистів, што інспіруют ся карпатском і етнічном музиком, театральны спектаклі, фільмовы показы, перформансы, варштаты та чысленны пленеровы подіі, што пройдут на рынку і улицях Нового Санча. Ідейом фестівалю єст вказувати богатство і ріжнороднiст карпатской культуры та будувати діалоґ медже традицийом а сучасністю. Орґанізаторы підкрисляют, што Карпаты OFFer то місце стрічы творців з ріжных держав реґіону Карпат, котры через штуку презентуют спільне дідицтво і його сучасны інтерпретациі.

Вiкенд пізнійше зачне ся 57. Медженародный Фестіваль Фольклору Гірскых Земель, котрый одбуде ся в Закопаным в днях 21.–27. серпня/авґуста. Під Татрами стрітят ся народны ансамблі з Польщы, Словациі, Хорвациі, Румуніі, Мадяр і многых інчых держав, презентуючы традицийну музику, танец, спів, кроі і культуру своіх реґіонів. В проґрамі фестівалю нашли ся м.ін. конкурсовы концерты, Народны Дни поєдных держав, пленеровы концерты, перехід улицями Закопаного, науковый семінар, реґіональны варштаты і занятя для діти. Єдном з подій буде тіж концерт «Музика Луком Карпат», ци концерт Штефана Штеця i Файты. Фестівальови товаришыти будут выставы фотографіі, кєрмеш народной штукы і ремесла та отворены варштаты закопяньскых артистів.

Фото: MCK Sokół