Сумар дня на 11. жолтня/октобра 2021 р.

Приносиме вам сумар медияльной ґрупы ЛЕМ.фм+ на ден 11. жолтня/октобра 2021 р.

Санкова і Бобова плянуют новы інвестициі в рамках польско-словацкого проєкту

Представникы ґмін Бобова і Санкова стрітили ся з представниками словацкых ґмін та Нижньой Полянкы цілю омовити деталі реализациі спільного проєкту. Плянуваный термін його реализациі то квітен/апріль 2023 рока. Санкова має уж полну документацию на будову роверовой стежкы і природничо-історичного парку. Част історична буде тыкала І світовой войны – будут там м.ін. поставлены пляншы з історичныма інформациями, макєта і простір для пленеровых лекций істориі. Як бесідує Малґожата Малух, війт ґміны Санкова, зааранжуване буде і місце з окопами, де ся будут находити фіґуры жолнірів. За історичном частю парку плянувана єст част природнича, з озерком, пляжом і островом, на якій буде мож ся достати лавком. Будут і сенсоричны алейкы выложены ріжныма материялами. Што більше, в парку має ся найти лука, над котром будут повішены гамакы, будут поставлены лавкы і дрібна архітектура. Бобова з унійного дофінансуваня в рамках польско-словацкого проєкту плянує побудувати амфітеатр. Буде він при улици Зеленій, де ся днес находят природничо-ґеолоґічный парк, роверове місточко і скейтпарк. Амфітеатр має архітектонічно навязувати до природничого парку, зато домінувал буде камін і дерево. До того побудувана має быти солянкова інгалятория. Як подає бургомайстер Бобовой Вацлав Ліґенза, цілковитый кошт задачы то ок. 7 млн злотых.

Завершеный ремонт устяньского мосту

На час завершеный был ремонт мосту, котрый ся находит на трасі повітовой дорогы нр 1496К з Ґладышова до Устя Руского, над ріком Ждынянком. Тырваючый місяц ремонт зачал ся 6. вересня/септембра тр., а в тым часі не был зробленый ниякій переізд при ремонтуваным мості, што выкликало протест серед вельох жытелів ґміны. Обовязували обізды, а од Устя одтятых было такой 10 сел. Перед ремонтом, в квітни/апріли тр., з огляду на злый стан мосту, вылученый был єден пас руху, а тонаж в переправі зменшеный был з 12 до 6 тон. Тепер на мості зас одкрытый єст переізд в обі стороны для авт до 12 тон. Кошт ремонту мосту то близко 220 тис. злотых.

Стріча з авторами альбому «Церкви в полудньово-східній Польщы»

Выдавництво Лібра просит на промоцию альбому «Церкви в полудньово-східній Польщы». В четвер, 14. жолтня/октобра, о год. 17.30 одбуде ся стріча з автором фотоґрафій Камільом Палюшком та автором тексту Ярославом Ґемзом. Подія пройде в Книгарни Лібра в Ряшові. Як інформує выдавництво на своім фейсбуковым профіли, рыхтуваны сут уж наступны промоцийны стрічы в інчых містах Польщы.

Нова роверова атракция в Ґорлицях

Уж неодолга в Ґорлицях завершена буде будова наступной роверовой атракциі. Будова Singletrack то проєкт якій переміг в голосуваню Громадяньскго Буджету Ґорлиц в 2019 році. Кошт його реализациі то близко 230 тисячів злотых. Для любителів ізды біциґльом і адреналіны зрыхтуваны сут три вариянты трасы: підіздова і дві зъіздовы. На роверовых трасах найдут ся специяльны прешкоды, такы як деревяны лавкы ци насыпы з землі або каміня. На початку підіздовой трасы має быти тіж зрыхтуваный стартово-выпочынковый пляц, з лавками і стояками на біциґлі.