Сумар дня на 12. грудня/децембра 2023 р.

Приносиме вам сумар медияльной ґрупы ЛЕМ.фм+ на ден 12. грудня/децембра 2023 р.

Пряшівскій Самосправный Край вчера, в часі остатнього тогорічного засіданя затвердил буджет на 2024 р

В будучым році Пряшівскій Самосправный Край має до диспозициі понад 275 млн евро. В буджеті увзгляднили 4 млн евро з думком о дотациях на добры проєкты в реґіоні, о котры заінтересуваны будут мочы ся старати уж початком нового рока. Особливо о фінансову підпору можут ся старати проєкты, котры тыкают розвитку роверового транспорту, туристикы, культуры і спорту, охороны природы, підпоры службы здоровля ци социяльной службы. Посланці ПСК схвалили тіж 130 тис. евро на Вызву Партиципативный рахунок, котра єст перезначена на реализацию публичных проєктів і задач. Наступных 150 тис. евро за посередництвом Фундациі Пряшівского Самосправного Краю буде перезначеных на поміч по землетрясіню. В тым примірі фінансове спертя буде признаване не лем поєдным особам, але тіж селам, ци парохіям, котры потерпіли в жолтни/октобрі тр. Про механізм признаваня фінансовой підпоры власти Фундациі будут дискутувати на найблизшым засіданю. Більше про буджет ПСК на 2024 р. можете чытати на нашым портали.

Половина робіт в Польковицкым Центрі Здравотных Услуг уж готова

Перша половина робіт в порадни для жен в Польковицкым Центрі Здравотных Услуг єст уж на кінцьовым етапі. Модернізация зачала ся в липци/юлию тр. і в єй рамках м.ін. достосували поміщыня до актуальных вымогів з особливым увзглядніньом осіб з неполносправностями, вымінили електричну і водну інсталяциі, замонтували нове освітліня та модерне выпосажыня ґабінетів. Як поінформувал презес Польковицкого Центра Здравотных Услуг в будучым тыжни закінчат ся першы працы, котры дозволят оддати до хоснуваня част будинку. Згідні з пляном модернізация закінчыт ся в лютым/фебруарі 2024 рока.

Рекордовый Мемориял Банаха в Польковицях

В Польковицях прошол XII Мемориял Мєчыслава Банаха. В змаганях в настольным тенісі взяло участ рекордове чысло участників – аж 110 любителів того спорту. Серед них присутны были підопічны польковіцкой секциі настольного теніса з обшыри Нижнього Шлеска і любушского воєвідства. Змаганя прошли в трьох катеґориях, в каждій нагороджено першых шіст місц. Додаткову нагороду отримали наймолодшый і найстаршый з участників. Подія орґанізувана єст секциийом настольного теніса КС Ґурнік Польковиці.

«Юлия» – 40. років артистичной творчости Юлиі Дошны

Музей Дворы Карвациянів і Ґладышів в Ґорлицях просит на выставу пн. «Юлия» з нагоды ювілею 40. років артистичной творчости Юлиі Дошны. Презентувана выстава вказує подорож артисткы через цілу єй артистичну діяльніст, од 80 років ХХ ст. коли співала в ансамблю Лемковина, через ріжного рода спілпрацы з джазовыма ци клясичныма музиками, аж до актуальных проєктів. Презентуваны фотоґрафіі, плякаты і памяткы вказуют ріжны аспекты єй карєры і вклад в спадковину лемківской культуры. Над выставом почестный патронат тримат Староста Ґорлицкого Повіту, Мария Ґубала, і мож експозицию обзерати од 17. грудня/децембра до 14. січня/януара будучого рока.

Потяг з Мушыны до Попраду вертат на торы

Так як і в попередніх роках, в зимовым періоді на торы вертат потяг реляциі Мушына-Попрад. Од 30. грудня/децембра в каждый вікенд аж до 25. лютого/фебруара мож буде скорыстати з желізницьового получыня. Потяг буде выізджал о 10.00 год. з Мушыны, а уж коло 11.40 буде на місци – в Попраді. Назад буде мож вернути о год. 15.39. Потяг той реляциі ходит уж од парох років в часі зимовых і літніх вакаций, і што рока притігат многє чысло пасажерів.

фот. Дворы Карвациянів і Ґладышів в Ґорлицях, автор Мария Стшелецка