Сумар дня на 12. липця/юлия 2023 р.

Приносиме вам сумар медияльной ґрупы ЛЕМ.фм+ на ден 12. липця/юлия 2023 р.

Світовый Конґрес Русинів з одповідями од европейскых урядів

Приносиме дальшу актуализацию в справі намагань Світового Конґресу Русинів о вызнаня Русинів на Украіні за окрему нацийональну меншыну та дотримуваня іх прав. СРК фурт підкрислят, што підпорює намагы Украіны о евроінтеґрацию, єдночасно не устає в борбі о єднакы права для нашого народу – всядиль, де Русины жыют. В тій справі Світовый Конґрес Русинів звертат ся до европейскых орґанізаций і інституций, жебы права Русинів были забезпечены і Кыйовом. По бесідах з Венецийском Комісийом, писмо в тій справі председа СРК Штефан Лявинец передал і до Рады Европы. В остатніх днях пришли дві одповіди – од высокого комісаря Орґанізациі про Безпечніст і Спілпрацу в Европі про Нацийональны Меншыны Каірата Абдрахманова та од Директорияту про Східню Европу і Центральну Азию, од головы Украіньской Дивізиі Петры Ґомбаловой – котру зарекомендувал голова Европейской Рады Шарльс Мішель. Комісар Каірат Абдрахманов написал, што хоче продолжати діалоґ на тему цілой справы, зас в писмі з Брукселі пише ся м.ін., што права членів нацийональных меншын сут фундаментальныма цінностями Евросоюзу і находят ся серед критерий, котры треба выполнити, жебы держава могла вступити до ЕУ. З той причыны будут ся в Бруксели дальше призерати імплементациі украіньскых устав, котры односят ся до прав нацийональных меншын. Обі одповіди сут доказом, што справа Русинів не єст обоятна европейскым найвысшым іституциям.

Книжка Малярскій варштат Алойзи Зомпга в Бардийові та Віктора Зомпга в Бардийові і Креници в другій половині ХІХ ст. з нагородом

7. липця/юлия в Повітовій і Містно-Ґмінній Публичній Бібліотеці в Старым Санчы прошло вручаня Нагорід і Выріжнінь в рамках ХVI едициі дорічной почестной Нагороды «Сандеччына» ім. Щенсного Моравского. Нагороду в катеґориі індивідуальных робіт жырі рішыло передати на рукы проф. Тадеуша Трайдоса, автора книжкы пн. Малярскій варштат Алойзи Зомпга в Бардийові та Віктора Зомпга в Бардийові і Креници в другій половині ХІХ ст. Публикацию минулого рока печатал Студентскій Кружок Бескідксых Провідників в Варшаві. Цілю конкурсу орґанізуваного од 2007 рока є выріжняня печатаных в попереднім році книжок, завдякы котрым мож одкрывати незнаны карты істориі сандецкой землі, та промувати заслугы єй покровителя – Щенсного Моравского, в баданях і документуваню істориі Сандеччыны. Нагороджена книжка проф. Трайдоса порядкує дотеперішній стан знаня про творчіст артистів Алойзи і Віктора Зомпгів, якы сут авторами малярства м.ін. в грекокатолицкых церквах в Старині, Боґушы, Лелюхові, Андриівці, Злоцкым ци Креници.

Будут вежы і стежкы в коронах дерев

В ґорлицкым тырват будова єдной видоковой вежы, а дві сут на етапі проєктовых робіт. Зас в сусідніх Тяжковицях довершают послідні роботы над закінчыньом будовы вежы і стежкы в коронах дерев, якых одкрытя пройде неодолга – 20. липця/юлия. В Мощеници продолжат будова вежы. Постепенно довозят поєдны елементы конструкциі, а двигар укладат іх єден по другым. Фінал інвестициі передвидженый є на осін. Дві інчы інвестициі мают быти зреализуваны в Домініковицях і в Вапенным. Перша є фурт в фазі проєктуваня, зас для видоковой плятформы в Вапенным ґміна Санкова – інвестор, мают уж готову документацию, але потрібны сут послідні рішыня з Державныма Лісами. Проєктувана долгіст стежкы выносит коло 300 м. Констуркция буде вознесена зо сталі і дерева. При вході і выході зо стежкы будут замонтуваны елементы малой архітектуры, лавкы, кошы, задашыня. Рахуваный кошт задачы в Вапенным то коло 5 млн зл. Роботы быти може зачнут ся іщы того рока.

На праздник свв. Петра і Павла

Молебньом о 7.00 год. рано в церкви в Ганчові зачал ся послідній ден ХХХІІІ Пішого Поломничества Православной Молодежы на Святу Гору Явір – як каждого рока кінчыт ся оно в сам праздник свв. Апостолів Петра і Пaвла. По привитаню єрархів в церкви св. Михала Архангела в Высові, богослужыня од 10.00 год. проходят на самій святій Горі. Літургію при участи єпископа перемышльско-ґорлицкой єпархіі Паісия і священників той же єпархіі попередило посвячыня воды. Свята Гора Явір є популярным путницкым місцьом Лемків, вірны, што приходят ся гын помолити, укріпляют памят о чудах звязаных з обявліньом Божой Матери і єй покровительством.