Сумар дня на 12. листопада/новембра 2021 р.

Приносиме вам сумар медияльной ґрупы ЛЕМ.фм+ на ден 12. листопада/новембра 2021 р.

Дальшы ремонтовы працы на дорозі нр 1510 К Берест – Мохначка Выжня

Як інформує Повітовый Заряд Доріг в Новым Санчы, днес, 12. листопада/новембра, і в днях од 16. до 19. листопада/новембра тр. в год. од 8.00 до 18.00 ведены будут працы звязаны з ремонтом повітовой дорогы нр 1510 К Берест – Мохначка Выжня. В звязку з тым дорога буде днес закрыта для руху на одтинку ок. 800 м од крижівкы з воєвідском дорогом нр 981, в днях 16. і 17. листопада/новембра в місцевости Чырна і од крижівкы з ґмінном дорогом до Ізб до границі Чырной і Мохначкы Выжньой, та в днях 18. і 19. листопада/новембра од крижівкы з воєвідском дорогом 981 на долгости ок. 800 м і на одтинку в Перунці. Пропонуваный обізд іде державном дорогом нр 75 і воєвідском дорогом нр 981. Залежно од хвилі термін закрытя дорогы може быти зміненый.

Змодернізувана дорога до Нацийонального Парку Полонины

Пряшівскій Самосправный Край змодернізувал дорогу медженародного значыня Стащын-Улич коло границ з Украіном, котра єдночасно веде до Нацийонального Парку Полонины. Поінформувала о тым говоркыня Пряшівского Самосправного Краю Даша Єленьова. Новый асфальт має понад 8,4 км, зреконструуваны были і два мосты над ріками Ціроха і Уличка. Цілковитый кошт інвестициі то понад 2 млн евро. Як підкрислил председа Пряшівского Самосправного Краю Мілян Маєрскій, оправа трасы была важна так для місцевых, як і для туристичного руху в Полонинах, але і з медженародного погляду, з причыны прилучыня до дорогы першой клясы, будучой і коридором медженародных доріг Е58. Траса была модернізувана в рамках проєкту «Модернізация дорогового получыня медже Пряшівскым Самосправным Крайом і Закарпатском Областю Украіны». Проєкт буде мал другій етап. Початком будучого рока мают быти продолжаны працы на дальшых осмох кілометрах доріг, чым траса до Улича оправит ся як єдна ціліст.

Будут ревітализуваны желізницьовы леніі нр 108 і 110

Як поінформувало Повітове Староство в Ґорлицях, заряд повіту підпорил концепцию Маршалка Малопольского Воєвідства тыкаючу ревітализациі желізницьовых леній нр 108 і 110. В рамках зголошеного воєвідством проєкту має быти зревітализувана желізницьова ленія на одтинках: Ґорлиці – Ґорлиці Загіряны і Ґорлиці Загіряны – Ясло, як тіж побудуваный желізницьовый лучник в Ґорлицях медже леніями 108 і 110. Проєкт закладат і модернізацию пероновой інфраструктуры в ґмінах Мощениця і Лужна.

«Театрум Юрия Новосільского» в Сопоті

Од 18. листопада/новембра тр. в Державній Ґалериі Штукы в Сопоті буде мож обзерати выставу пн. «Театрум Юрия Новосільского». Выстава єст пробом нового пізріня на творчіст Новосільского, буде ся зосереджала на звязках артисты з театром. Новосільскій вказаный буде з єдной страны як сценоґраф, проєктуючый декорациі до театрів ляльок, а з другой як маляр, якого власный театр грат на образах. На выставі запрезентувана буде м.ін. реконструкция видовиска «Кресиво» Ганны Янушевской, яка створена была на потребы експозициі «Юрий Новосільскій. Театр ляльок. Запискы – част пята» в Ґалериі Стармах в 2015 р. Першыраз буде мож тіж зазріти до працовні Юрия Новосільского, што ся находила колиси в його хыжы в Кракові. Буде в ній мож обзерати малюваны артистом меблі, предметы, як і образы. На експозициі вкажут і полотна, котры артиста намалювал медже 1954 і 1996 роком. Вшыткы експонаты сут з колекциі Тересы і Анджея Стармахів. Выстава буде одкрыта до 20. лютого/фебруара 2022 рока.