Сумар дня на 14. марця 2022 р.

Приносиме вам сумар медияльной ґрупы ЛЕМ.фм+ на ден 14. марця 2022 р.

Русины на Мадярах выберут свого говорцю в мадярскым парляменті

3. квітня/апріля на Мадярах пройдут парляментарны выборы. Сут они повязаны і з выбераньом представників меншын. На Мадярах в рамках парляментарных выборів тринадцет нацийональных меншын, в тым русиньска, має право выбрати свого депутата або говорцю, залежно од того, кілько знают назберати голосів. Кєд же подля посліднього списуваня Русинів на Мадярах не єст дост, жебы могли выбрати сой депутата, будут они зас выберати говорцю. В двох каденциях дотепер была ним Віра Ґіріц. Говорця в мадярскым парляменті має веце прав, лем не може голосувати. Автоматично стає єднак членом нацийонального парляментарного комітету, де уж голосує. 2. марця список кандидатів до тогорічных выборів опубликувало Вседержавне Русиньскє Самосправуваня. На списку находит ся десятьох кандидатів, тє. о єдного веце як штырі рокы тому.

Вопрос до Міністра Внутрішніх Справ і Адміністрациі в справі дискримінациі німецкой меншыны

Як поінформувала меншынова сторона Спільной Комісиі Уряду та Нацийональных і Етнічных Меншын, Спілведучый Комісиі репрезентуючый меншыны, Григорий Куприянович, дал вопрос в справі дискримінациі німецкой меныны в Польщы до Міністра Внутрішніх Справ і Адміністрациі, якій згідно з польскым законодавством єст тым властивым до справ меншын. Справа тыкат розпоряджынь Міністра Едукациі і Наукы, якы ограничают вчыня німецкого языка як меншынового. Єдно з розпоряджынь зменшат од 1. вересня/септембра тр. тыжньове чысло годин вчыня німецкого як меншынового языка з трьох до єдной годины. В писмі до Міністра Внутрішніх Справ і Адміністрациі нашли ся вопросы і одповідаючы ім правны переписы. Звідано м.ін ци Спільна Комісия могла быти поминена в примірі введіня правных актів тыкаючых єй властивости. В писмі нашол ся і внесок до Міністра, згідно з переписом, о писемну анализу і оціну реченой ситуациі.

Дискримінациі німецкой меншыны сопротивляют ся науковці і дослідникы

В середу, 9. марця, в імени середовиска науковців і дослідників проф. Цезарий Обрахт-Прондзыньскій передал на рукы Міністра Едукациі і Наукы – Пшемыслава Чарнка, лист, в котрым сопротивляют ся безпосередній дискримінациі німецкой меншыны в Польщы і кличут Міністерство Едукациі і Наукы скасувати шкідливы для той меншыны рішыня. До листу были долучены Постанова Комітету Социйолоґіі Польской Академіі Наук в справі принципів фунґуваня публичной освіты веденой в языках меншын в Польщы та Протест академіцкого середовиска проти зменшыню парляментом Польской Республикы дотациі на едукацию нацийональных і етнічных меншын та вчыня реґіонального языка, вєдно з листом підписів – підписали ся 1033 особы.

Зміна розкладу ізды потягів в малопольскым воєвідстві

Од суботы, 12. марця, в малопольскым воєвідстві обовязує новый розкляд ізды потягів. Зміна тыкат і вшыткых получынь реализуваных перевозником Polregio зо стациі Ґорлиці Заґужаны, Крениця, та вшыткых пристанковых стаций в реґіоні. Зміны звязаны сут з модернізацийныма і направчыма працами на обшыри малопольского воєвідства. Зміненый розкляд ізды має обовязувати до 11. червця/юнія тр.