Сумар дня на 12. мая 2022 р.
Приносиме вам сумар медияльной ґрупы ЛЕМ.фм+ на ден 12. мая 2022 р.
ХІІ Медженародне Бієнале Лемківской/Русиньской Культуры
Кус більше як о тыжден в Креници зачне ся ХІІ Медженародне Бієнале Лемківской/Русиньской Культуры. Пройде оно в днях 20.-21. мая. То подія, яку орґанізує Стоваришыня Лемків во спілпрацы зо Світовом Радом Русинів. Проґрам тогорічного Бієнале буде подібный до тых з попередніх років. Зачне ся традицийно од поклоніня вызначному Лемкови, Епіфанови Дровнякови, перше на цмонтери, де спочыват, а пак при памятнику Никыфора Креницкого на дептаку. Дальше запрошены гості, в тым русиньскы ансамблі, підут хороводом до місця, де будут проходити головны артистичны выступліня. В проґрамі Бієнале є і презентация русиньскых выдань, дискусиі нт. лемківской/русиньской культуры, критичны доповіди, выставы, проведене буде і засіданя Світовой Рады Русинів. Подія закінчыт ся в суботу вечером.
Пікнік Lemko Hall
Карпаторусиньскій Американьскій Центр Lemko Hall просит на лемківскій пікнік з нагоды Русаля. Одбуде ся він в неділю, 12. червця/юнія, в Гартсдейль в штаті Ню Йорк. То уж дальшый раз, коли америцкы Лемкы зыйдут ся з нагоды Зеленых Свят. Участ в подіі є платна – деталі найдете на фейсбуковым фанпейджы. В проґрамі наша музика, а при тым порядна гостина. Сам пікнік одбуде ся в гардых обставинах природы, серед зеленых лісів, якы хоц кус годны припомнути Старый Край.
Нова книжочка о Никыфорі
Выдавництво Лібра PL выпустило в передпродажы нову ілюструвану книжку для діти, яка оповідат о жытю і творчости Епіфана Дровняка (Никыфора Креницкого). То публикация, авторком якой єст Мария Стшелецка, докторка плястичных наук і авторка ілюструваной книжкы про діти пн. «Бескід без кіту». Публикация чыслит 56 стран і має тверду окладинку.
Премєра книжкы пн. «Никыфор» заплянувана єст на 27. мая, можна єй придбати безпосередньо на сайті выдавництва.
Новы лямпы в Ґорлицях
Ґорлиці плянуют в тым році выдаткувати 6 млн зл на модернізацию містецкого освітліня. Што якісый час на поєдных улицях прибывают новы лятарні. В остатнім часі замонтували 4 новы стопы при ул. Рыбіцкого, а недолога лямпы станут при трьох ремонтуваных дорогах, при Бліха, Ґарбарскій і Надбережній. В рамках тогорічной модернізациі мают быти схоснуваны оправы LED z інтеліґентным системом стеруваня. Сут они не лем туньшы, але і барже економічны в пізнійшій експлоатациі. Про декотрых проблемом єст лем тото, што LED-овы лямпы дают біле світло, а дотеперішнє, старе освітліня давало барже жолте.
Повязаны дописы
Ґорлиці 106,6 MHz
