Сумар дня на 12. мая 2023 р.

Приносиме вам сумар медияльной ґрупы ЛЕМ.фм+ на ден 12. мая 2023 р.

Археолоґічне одкрытя на трасі Via Carpatiа

Археолоґы працуючы при будові Via Carpatiа, конкретно при одтинку дорогы С19 на Підкарпатю, медже Коросном а Місцьом Пястовым, одкрыли осаду з римскых часів. Археолоґічны досліджыня медже узлами Коросно і Місце Пястове сут реализуваны на жаданя Ґенеральной Дирекциі Державных Доріг і Автострад. Будова каждой новой дорогы в Польщы єст попереджена провіряньом терену археолоґами. На реченым одтинку С19 были вызначены три становиска, на єдным з них, найвекшым, были одкрыты обєкты осады вступні датуваны на період римскых влиянь. Окрем слідів забудувань нашли гріб з кінця неоліту і части керамікы. Можливе, же сут звязаны з пшеворском культуром. Одкрыта осада заинимат 3 гектары. Правдоподібно єй част находит ся поза тереном інвестициі, а інча част была знищена при будові находячой ся близко державной дорогы нр 28. Досліджыня терену мают згідно з гармоноґрамом потырвати іщы два місяці. Обшыр была часово вылучена з будовы, а дальшы рішыня має підняти консерватор забытків. Покля што не знатя, ци працы спричынят опізніня будовы дорогы.

ПСК побудує дальшу біциґльову стежку

Пряшівскій Самосправный Край побудує дальшу біциґльову стежку медже русиньскыма селами в Полонинах. Іде о веце як 4-кілометрову трасу од села Влыч по село Кривый. Як подало Одділіня комунікациі ПСК, край підписал догваріня на фінансову дотацию з Міністерством Інвестиций, Реґіонального Розвитку і Інформатизациі Словацкой Республикы. Кошт інвестициі то 1,64 млн евро. Траса роверовой стежкы Влыч – Кривый є дальшым етапом біциґльового округу Poloniny Trail. В пляні на тот рік сут і дальшы трасы – медже Рунином і Кривым, медже Влычом і Калином Розтоком, як і перехід трас на Стащыньску Розтоку. Цілый округ має быти долгій на 86 кілометрів. Проєкт має на ціли підняти потенциял Полонин і позитивно влинути на розвиток туристикы в тій части державы. Більше чытайте в дописі на нашым портали.

Медженародна конференция BikeActive

В понедільок 29. мая в Маєровцях, в Маєровскым каштели, пройде медженародна конференция пн. «Зрівноваженый розвиток активной туристикы, в тым роверовой, через реализацию інвестицийных і промоцийных діянь партнерів польско-словацкого погранича». Проєкт з такым наголовком (коротка назва BikeActive) єст реализуваный в 2023 році Стоваришыньом Локальной Ґрупы Діяня «Басен рікы Вислок» з Польщы і Локальном Ґрупом Діяня Под градом Чічва зо Словациі. Цілю проєкту єст розвиток туристикы на терені обох спілпрацуючых локальных ґруп діяня через інвестивцийны діяня і выміну практик медже представниками середовиск занимаючых ся розвитком туристикы. Конференция поділена буде на два блокы, што тыкати будут туристикы як елементу економічного розвитку реґіонів та розвитку біциґльовой туристикы на польско-словацкым пограничы.

Лемківска кухня в Скансені Погіряньского Села в Шымбарку

Од 3. до 30. вересня/септембра тр. в Скансені Погіряньского Села в Шымбарку будут празднувати Европейскы Дни Дідовизны. В тым часі будут проходити показы і варштаты звязаны з традицийном кухньом Лемків і Погірян. Участникы єднодньовой подіі будут мочы познати стары кулінарны рецептуры з реґіону Низкого Бескіду. Подіі буде товаришыла часова выстава посвячена давному кухняному ґратю, котру буде мож звиджати до кінця вересня/септембра тр.