Сумар дня на 12. січня/януара 2024 р.

Приносиме вам сумар медияльной ґрупы ЛЕМ.фм+ на ден 12. січня/януара 2024 р.

Міністерство Климату і Середовиска ограничыт вытинку лісів

Польскє Міністерство Климату і Середовиска ограничыт вытинку дерев передвиджену на 2024 р. в найважнійшых польскых лісах. О деталях поінформувала 8. січня/януара підчас пресовой конференциі міністер Павлина Генніґ-Кльоска. Як подала, охорона лісів то єден з пріоритетів новых власти. Такій обовязок выникат і зо зобовязань взглядом Европейской Уніі, особливо середовисковых директив і Стратеґіі про біоріжнорідніст 2030. Згідно з рішыньом міністер, введены будут ограничыня вытинкы на 10 обшырях, м.ін. в Бєщадах, Карпатскій Пущы, як і в околици Івонича. Окрем того роблят над системовым розвязаньом, в котрым найде ся веце обшыри, і котре буде консультуване з представниками Державных Лісів, самоурядами і локальныма соспільствами. Іде о найціннійшы фраґменты лісів – комплексы старых дерев в віку 100-200 років, водоохоронны і гірскы лісы. Ограничыня не перекрочат 20-30% плянуваных вытинок. Як подал на конференциі віцеміністер Миколай Дорожала, на стороні Міністерства Климату і Середовиска буде поміщена специяльна закладка, де буде мож інформувати о місцях, котры вартат обняти додатковом охороном. Будут они пак анализуваны Сторона має в активный спосіб выйти до локальных соспільности.

Здружыня Інтеліґенциі Русинів Словациі печатало дві історичны публикациі 

Кінцьом минулого рока Здружыня Інтеліґенциі Русинів Словациі выдало дальшы дві монументальны істориичны публикациі, котры сут цінным вкладом про вшыткых, котры хоц лем дакус інтересуют ся русиньском історийоґрафійом. «Чехословацкій світ в Карпатах 3» то дальшый том сериі книжок авторства Владиміра Куштека, котры сут писаны в чешскым, словацкым і русиньскым языку, і котры збогачат вельо цінных історичных знимок. В третім томі прочытаме про воєннный жывот в часах першой Чехословацкой Республикы, чешскых і словацкыx підприємциів в Ужгороді і Хусті, Підкарпатскє астрономічне общество в Ужгороді, высыланя Чехословацкого радия на Підкарпатску Русь, але і о розвитку будуваня доріг і автомобілизмі на Підкарпатю, о земледільстві, гасічах ци о кінах на Підкарпатю, і вельо більше. Друга з книжок то розшырена версия публикациі з 2003 р. пн. «Краіньска границя медже Словацийов і Підкарпатском Русьом (рр. 1919 – 1939)», авторства історика Петера Шворца. В новій версиі найдеме коло єдной третьой нового материялу. Обі публикациі были підпорены з Фонду на підпору культуры нацийональных меншын. Більше про книжкы чытайте на нашым портали.

Чергова зона выпочынку в Польковицях

В Польковицях возникло чергове місце до активного выпочынку. Днес технічно одданый буде проєкт «Активне Осіля Овоцове» в Польковицях Нижніх. На побудуваным модерным рекреацийным пляци нашли ся м.ін. зовнишня силовня і столы до теніса. То черговый раз, коли в рамках Польковицкого Громадяньского Буджету жытелі поставили на зону выпочынку.

Фериі 2024 з Маґурскым Нацийональным Парком

Як каждого рока Маґурскій Нацийональный Парк просит до спільного проведіня зимовых вакаций. Фериі 2024 з Маґурскым Нацийональным Парком одбудут ся в днях од 15. січня/януара до 25. лютого/фебруара. Каждого тыжня буде ся одбывала зимова прогулька, а додатково підчас підкарпатскых зимовых вакаций будут проходити тематичны занятя. Участ в подіях єст безплатна. Дрібниці будут публикуваны каждый понедільок на фейсбуковым сайті Парку.