Сумар дня на 12. жолтня/октобра 2022 р.

Приносиме вам сумар медияльной ґрупы ЛЕМ.фм+ на ден 12. жолтня/октобра 2022 р.

Осередок КАРТА нагородил Каміля Кмака

Каміль Кмак, Ґрибівян, соспільник, реґіоналиста, пропаґатор істориі і хоронитель локальной спадковины, дбаючый особливо о жыдівску памят, остал лавреатом нагороды Осередка КАРТА ім. Катажыны і Януша Мєрніцкых за свою громадяньску діяльніст, а конкретно – «за діяня для історичной памяти, што служат громадяньскій спільноті». Ґаля вручыня нагороды прошла в понедільок, 10. жолтня/октобра, в Варшаві, як єдна з подій святкуваня 40-літя діяльности КАРТЫ. КАРТА діє од 4. січня/януара 1982 рока. По близко осмох роках в підземли, вєдно з початком ІІІ Польской Республикы – діє леґальні, а од 2004 рока як орґанізация публичного хосну. В Осередку публичный хосен пониманый є як солідарна робота над історичном памятю – в імя громадяньской спільноты. В своій діяльности урухомила м.ін. прекурсорскій Архів Бесідуваной Істориі (AHM) ци Дом Стріч з Історийом. Нагородженый Каміль Кмак, вєдно зо Стоваришыньом Саґа Ґрибів, котрому шефує, зреализували проєкт Тыхій Мемориял, значыт 10 муралів, што бесідуют про історию реґіону, єден з муралів находит ся во Фльоринці – то лемківска родина, котру выселили в 1947 році. Сердечні ґратулюєме!

Конец складовиска небезпечных субстанций в Ґорлицях уж близко

Іщы того місяця має закінчыти ся черговый, і быти може послідній уж етап ліквідациі нелеґального складовиска на обшыри ґорлицкого Ґлімару. Разом, в тым етапі, з бывшой рафінериі мают усунути веце як 2500 тон ріжного рода небезпечных субстанций. Занимат ся тым фірма Мо-Брук. Тырват дочыщаня великого розміру резервуарів, а дотепер вывезли веце як 1800 тон зобраных гын бочок, маузерів ци палет выполненых напр. лікарствами по терміні. Справа вывозу небезпечных субстанций з обшыри ґорлицкой рафінериі тырват уж два рокы. Ліквідацийом складовиска мусіло заняти ся місто, котрому на тоту ціль признали 40-мілийонову дотацию з Нацийонального Фонду Охороны Середовиска, додатково містецкій самоуряд взял 8 млн зл пожычкы од воєвідства, передал тіж своі середкы. Вчас вывозу вказало ся, што складовиско є векше, як початково думали. В червци/юнію тр. місто підписало анекс до першой умовы, котрый обнял вывезіня черговых 2,5 тис. тон за близко 25 млн зл. Послідні одпады мают вывезти до 20. жолтня/октобра.

Хто хоче грати, співати або танцувати в Кычері?

Лемківскій Ансамбль Пісні і Танця «Кычера» на своім офіцийнымфейсбуковым фанпейджы поінформували о наборі новых членів до колективу. Прошены сут охочы до складу капелі, танцювальной і співочой ґруп. Пробы проходят з кажду пятницю в Ліґници в год. од 17 до 20. Веце інформаций отримате під номером: 726 827 277.

Меншынова конференция в Ополи

В понедільок і віторок в Ополи проходила наукова конференция пн. «Нацийональны і етнічны меншыны в Польщы, німецкы меншыны в Европі» зорґанізувана Домом Польско-Німецкой Спілпрацы та Центром Досліджынь Німецкой Меншыны. Вчас одкрытя конференциі, віцемаршалок опольского воєвідства Зузанна Донат-Касюра підкрислила, што меншыны сут важном частю европейского соспільства. Додала, што конференция має тіж едукаицйный і популяризаторскій вымір. Кристина Мазалік зо Шлезского Університету, котра занимат ся охороном прав німецкой меншыны в Польщы, оцінила, што трафляют ся приміры дискримінациі, як хоц бы товды, коли повекшыли Ополе – до складу міста вошли сусідні малы місцевости і німецка меншына не може рахувати на ґаранцию охороны права до двоязычных таблиц з назвми місцевости. Конференция проходила під патронатом опольского воєвідства.