Сумар дня на 13. червця/юнія 2023 р.

Приносиме вам сумар медияльной ґрупы ЛЕМ.фм+ на ден 13. червця/юнія 2023 р.

Новый набір внесків для приграничных проєктів

Проґрам Інтерреґ Польща-Словация одкрыл новый набір внесків о дофінансуваня для приграничных проєктів. О фінансову підпору можна ся старати в трьох катеґориях: «туристика і культура», де промуваны будут проєкты звязаны з культуровом та природничом спадковином; «електромобільніст» – пуля перезначена на розвиток доступности до комунікациі, і остатня катеґория то «інституцийональны спілпрацы», де грошы можут быти перезначены на укріпляня ци одкрываня новых спілпрац або на збільшаня компетенций осіб затрудненых в інституциі. Внескы мож складати електронічні до 29. вересня/септембра. Дрібниці і формулярі находят ся на сайті проґраму.

Гірскы Змаганя Маластівска Маґура уж в тот вікенд

В найблизшый вікенд 16.-18. червця/юнія десятый уж раз пройдут Гірскы Змаганя Маластівска Маґура. Орґанізатором подіі єст Бічскій Автомобільклюб. Змаганя зачнут ся в пятницю і уж товды мож буде пообзерати участників на ґорлицкым рынку. В дальшых двох днях пройдут два етапы змагань, першый в суботу, а другій в неділю. Як передала Старостка Ґорлиц Мария Ґубала, то найліпша нагода для промоциі реґіону і до заохочыня туристів, жебы іщы раз приіхали до ґорлицкого повіту. Маршалок Малопольского Воєвідства Вітольд Козловскій, якій тримат патронат над тогорічныма змаганями, підкрислил, што подія промує спорт і додатково вписує ся в стратеґію воєвідства, особливо в тым важным часі рыхтувань до Европейскых Ігр.

Собітковы традициі в Скансені в Шымбарку

О два тижні, 25. червця/юнія пройде єдна з найпопулярнійшых в ґорлицкым повіті подій – Малопольскы вінкы. Буде то уж VІ едиция стрічы, яка посвячена єст традициі собіток. Так як і в попередніх роках, подія пройде в пленері, в Скансені Погіряньского Села в Шымбарку і зачне ся о 15.00 год. Орґанізаторы Малопольскых вінків зрыхтували для участників ріжного рода конкурсы і варштаты, a o артистичну част собіткы задбают члены локальных ансамблів. На конец дня буде нагода принимати участ в традицийных собітковых обрядах при ватрі і пущаню віночків по воді. Почестный патронат над подійом тримат Маршалок Малопольского Воєвідства Вітольд Козловскій.

Вакациі в Маґурскым Парку

Маґурскій Нацийональный Парк просит до участи в літніх варштатах. То не першый раз як власти парку орґанізуют вакацийны варштаты і прогулкы для діти, єднак як мож прочытати на іх сайті – тогорічна подія під гослом «Природничы призмы» має новы атракциі. Діти будут мочы взяти участ в додатковых занятях присвяченых орнітолоґіі, архітектурі природы, трансферам рослин, етиці в лісі ци натуральным барвникам. Будут тіж ведены театральны варштаты в пленері з Марийом Стшелецком, авторком книжкы «Бескід без кіту». Участ в варштатах єст дармова, але треба памятати о скоршій резервациі місц. Детальный плян з термінами і потрібныма для діти згодами участи онедолга найде ся на сайті МНП.

Консультацийна стріча о вписаня на Державный Спис Нематерияльной Культурной Спадковины лемківской культуры і лемківского языка

Припоминаме, што 1. липця/юлия в Рускій Бурсі в Ґорлицях пройде консультацийна стріча в справі вписаня на Державный Спис Нематерияльной Культурной Спадковины лемківского языка і лемківской культуры. Подія зачне ся о 15.00 год. і прошены сут на ню вшыткы Лемкы, котры ідентифікуют ся з лемківскым языком і лемківском культуром. Консультациі орґанізуваны сут Стоваришыньом «Руска Бурса» в Ґорлицях і Стоваришыньом Лемків.