Сумар дня на 14. грудня/децембра 2022 р.

Приносиме вам сумар медияльной ґрупы ЛЕМ.фм+ на ден 14. грудня/децембра 2022 р.

Польковиці по другых консультациях

В понедільок 12. грудня/децембра прошол другій етап соспільных консультаций, што тыкали переходу через Польковиці желізницьовой леніі в рамках Аґломерацийной Желізниці Мідьового Басену. Вчас стрічы з жытелями представникы проєктанта бесідували м.ін. о тым, што повело ся зробити дотепер та якы высновкы ідут з анкєт, котры зробили проєктант і Ґміна Польковиці. Згідно з результатами анкєт – найвеце осіб хоче, жебы ленія през Польковиці вела або через обшыр Специяльной Економічной Стрефы, або слідом бывшой Державной Дорогы но 3, на одтинку через місто. Ефектом другого етапу консультаций будут роботы над выбором трьох з пятьох представленых вариянтів трасы. І зас до увагы будут брати голосы жытелів та присутных на консультациях самоурядовців. Технічны анализы та зобраны высновкы представлят вчас третього етапу консультаций, котрый вступні заплянували на серпен/авґуст будучого рока.

В Волохах наше джерело

В днях од 16. до 18. грудня/децембра проходит проєкт «Сила Карпат» орґанізуваный Татряньскым Музейом в Закопаным. «Сила Карпат» одбыват ся в рамках векшой подіі, бо з нагоды 18. едициі фестівалю «Сила Гір». Волохы то етнос, котрый осягнул найвекшый успіх в колонізациі і формуваню культуры Середньо-Східньой Европы. В рамках подій заплянували варштаты волошского ремесла: буде кераміка, артистична обробка скоры, сницарка, ковальство ци вырабляня пастырскіх інструментів. Буде мож взяти участ в «Волошскым дискусийным панели» та в нештоденній прогульці пн. «Волошска едукация в дорозі». Проґрам є одповідю на штораз векшу, в кругах карпатскых реґіоналистів і жытелів гір, потребу вертати до джерел карпатской культуры, котра як раз сідит в волошскых традициях, што сігяют в глубину старовинной істориі Балканів. Головном інтенцийом дискусийного панелю є сконфронтувати дотеперішнє знаня о Волохах, котре часто одходит од історичных фактів, мітів, котры повторюют писаны і бесідуваны джерела, з актуальным станом знаня.

В суботу концерт в рамках фестівалю «Музика заклята в дереві»

Роздумуваня Єжы Гарасимовича на Різдво – такій наголовок має концерт Юлиі Дошны і Мирослава Боґоня, котрый пройде уж в найблизшу суботу 17. грудня/децембра в костелі свв. Филипа і Якова в Санковій. Концерт товаришыт офіцийному одкрытю Майстерні Карпат, што находит ся по сусідскы до храму. Maйстерня Карпат то місце задумане як простір до стріч розмаітых люди, особливо до меджепоколіньовой інтеґрациі. Реализуют гын проєкт пн. «Родинный вельопоколіньовый стіл» фінансуваный Міністром Едукациі і Культуры в рамках проґраму «Меджепоколіньовы Едукацийны Центры – підпора меджепоколіньовой інтеґрациі». Спілорґанізатором концерту, а орґанізатором Майстерні Карпат єст Стоваришыня Civitas Nostra.

Соспільны колекты на русиньскы выданя

Через сайт StartLаb ведена є соспільна колекта, жебы выдати платню з русиньскыма колядами од Домінікы Новотной. Русиньска співачка рыхтує цедечко пн. «Спий Ісусе, спий», на котрым найдут ся і старославяньскы коляды. До кінця кампаніі остало 7 днів, цілю є зобрати 6000 евро. В остатнім часі на спомненым сайті повело ся зобрати потрібну квоту на підпору книжкы Ореста Сабо «О угорскых Русах (Русины)» в перекладі з історичным коментарьом. Колекту орґанізувало Обчаньскє Здружыня молоды.Русины.