Сумар дня на 13. грудня/децембра 2022 р.

Приносиме вам сумар медияльной ґрупы ЛЕМ.фм+ на ден 13. грудня/децембра 2022 р.

46. і 47. засіданя Выбору про нацийональны меншыны і етнічны ґрупы

В середу 7. грудня/децембра в Братиславі прошло получене 46. і 47. засіданя Выбору про нацийональны меншыны і етнічны ґрупы Рады влады Словацкой Республикы про людскы права, нацийональны меншыны і родову рівніст. Єдном з тем тогорічньой стрічы был список сел і міст, в котрых громадяне Словациі творят потрібну квоту, жебы село або місто могло быти меншынове, значыт двоязычне. В часі засіданя бесідували тіж м.ін. на тему шкіл і вчыня меншыновых языків (русиньского языка вчат лем в штырьох предшколях і двох основных школах), о справі кірилиці на транспортных табличках по русиньскы, а тіж занимали ся і ситуацийом коло принятя закону о поставліню нацийональных меншын. На засіданю была участна і директорка Фонду на Підпору Культуры Нацийональных Меншын, котра передала інформацию о роботі фонду за 2022 рік. На конец стрічы члены Выбору підяли плян на 2023 рік. Наступне засіданя комісиі пройде в лютым/фебруарі 2023 р.

ХХІ Велия Народів

В неділю 11. грудня/децембра в Ліґници прошла 21. Велия Народів. Того рока до спільного стола сіли м.ін. Лемкы, Полякы, Німці, Украінці, Жыды і Американе. Цілю подіі єст близше познати своіх сусідів. Жытелі єдного міста, котры ріжнят ся традициями, культуром ци реліґійом, вказуют своі звыкы і тото, як выглядают свята в ріжных родинах. Ініцияторком Велиі Народів єст Ельжбєта Хухольска, котра саму подію называт уж традицийом. Як подала, єст то найліпша нагода, жебы побесідувати і ся познати. Подія орґанізувана єст думкодавчыньом Велиі разом зо Стоваришыньом Жен Европы при помочы Уряду Міста Ліґниця і Ліґницкого Центра Культуры. На стрічы присутны были і представникы Стоваришыня Лемків. Од СЛ голос заберал м.ін. Любомир Горощак.

Ремонты доріг і обєктів в в ясельскым повіті

В суботу 10. грудня/децембра офіцийні оддано до хоснуваня ремонтуваный міст в Жыдівскым. Інвестиция была реализувана в рамках задачы «Ремонт мосту на повітовій дорозі Крампна-Жыдівскє-Граб». Єй вартіст то понад мілийон злотых, з чого більше як 800 тис. зл то дофінансуваня з Лісового Фонду. Міст в Жыдівскым то не єдина інвестиция зреализувана при дофінансуваню з Лісового Фонду. Завдякы підпорі в ясельскым повіті выремонтували тіж два одтинкы повітовых доріг і, як заповіл ясельскій староста, то іщы не конец, бо в будучым році заряд повіту хоче продолжати ремонты мостів і повітовых доріг, жебы поправити безпеку і комфорт подорожуючых.

Буде ремонт даху церкви в Лабовій

Церков в Лабовій буде мала ремонт даху. Понад 200-літній храм од долшого часу потрібувал ремонту, єднак його кошт был за великій. Початково працы тыкали лем одновліня поліхроміі, котра находит ся в святыни. На щестя неодолга зачне ся ремонт даху в церкви, а вшытко завдякы єдному з найменшых в Польщы ґатунків мышпергачів – підковоносови малому, котрый має своє літнє становиско на поді в обєкті. Зато, же єст то ґатунок під охороном, ремонтом даху займе ся Реґіональна Дирекция Охороны Середовиска в Кракові, в рамках охороны становиск, де выступує мышпергач. Вымінене буде м.ін. покрытя і істаляция охороны перед блискавицями. Реновацию пройде тіж мурувана вежа. Важный єст тіж час, бо ремонтовы роботы мусят ся завершыти перед кінцьом марця, закля мышпергачы находят ся в своіх зимовых становисках. До 16. грудня/децембра Реґіональна Дирекция Охороны Середовиска жде на пропозициі выконавців.

Фот. Повітове Староство в Яслі