Сумар дня на 13. квітня/апріля 2021 р.

Приносиме вам сумар медияльной ґрупы ЛЕМ.фм+ на ден 13. квітня/апріля 2021 р.

«Забер 5 з ліса» – помож в прятаню лісів

Ґмінный Осередок Культуры в Санковій прилучыл ся до загальнопольской акциі прятаня лісів «Забер 5 з ліса». Акция ведена єст уж од парох років і тішыт ся великым заанґажуваньом люди. Основом єст заохотити жытелів даной обшыри до прогульок лісом, а кєд натрафлят на дакы смітя, мают іх забрати мін. 5 штук і вышмарити до одповідніх контенерів. Пак можут зробити знимку і означыти ю гаштаґом #zabierz5zlasu, што дозволит пошырити акцию. Проблем смітя в лісах ци вздолж доріг явит ся каждого рока. Особливо в ярнім періоді, коли зыйде сніг, вказуют ся новы місця нелеґального складаня смітя. Цілю акциі «Забер 5 з ліса» єст не лем порядок в лісовых обшырях, але тіж наголосніня того загального проблему.

«Олимпіяда – Мастер Натуры» і «Природник на медаль» – два новы конкурсы Маґурского Нацийонального Парку

Маґурскій Нацийональный Парк просит учеників основных шкіл з Малопольщы і Підкарпатя до двох природничых конкурсів «Олимпіяда – Мастер Натуры» і «Природник на медаль». Першый конкурс проходит в двох віковых катеґориях: для учеників кляс І-ІІІ і ІV-VI. Задачом представників першой віковой катеґориі єст зрыхтувати плякат до темы «Рослины і звірята голосу не мают – дай ім свій». Треба выбрати єдного героя і вказати, што хтіл бы повісти. Задача в другій катеґориі то зрыхтувати природничу мапу з околиц, де мешкат участник. На мапі винны ся найти місця природничо важны і інтересуючы для беручого участ в конкурсі. Дальшый конкурс посвяченый єст старшым ученикам, з кляс VII-VIII, іх задачом єст зробити презентацию обшыри, котру подля них вартат обняти охороном. В презентациі треба підкрислити природничу і краєвидову вартст выбраного місця. Лавреатам переданы будут нагороды придатны в часі ночуваня в шатрі. Працы треба слати до 30. квітня/апріля тр. Детальный реґулямін і вымаганя конкурсів находят ся на страні Парку.

Курортны ґміны з новосандецкого повіту будут ся старати о еколоґічу комунікацию

Три курортны ґміны – Мушына, Крениця і Пивнична – спільні старают ся о пілотажовый проґрам еколоґічной комунікациі. Бургомайстры і урядникы вшыткых трьох курортів 8. квітня/апріля мали нагоду тестувати електричны автобусы польской продукциі Pilea ARP. Як повіл для порталю Nasze Miasto Nowy Sącz бургомайстер Мушыны Ян Ґольба, в рамках спілпрацы трьох курортных ґмін старают ся о проґрам-пілот урухомліня еколоґічной комунікациі, котра буде обсугувала выбраны леніі в курортах. На тепер вшытко єст на етапі тестів, але результаты сут оптимістичны. Ґольба заповідат тіж, же кєд лем буде можливіст отримати дофінансуваня до розвитку електромобільности для курортів, то ґміны одраз будут ся о такє старати.

В долину выжнього Сану вернули жубры

На конец добра інформация з Бєщадів. Уж 18 звірят рахує одтворене дикє стадо жубрів в долині выжнього Сану. Было оно першым, якє явило ся в Бєщадах, на жаль 8 років тому природникы потвердили в стаді пошырююючу ся туберкульозу, што змусило власти до одстріліня цілого стада. В 2017 році рішено зас ввести на тоту обшыр дикы звірята. По близко штырьох роках потверджено, же стадо ся побільшат, а приверніня жубрів в тоту обшыр повело ся.