Сумар дня на 13. квітня/апріля 2022 р.

Приносиме вам сумар медияльной ґрупы ЛЕМ.фм+ на ден 13. квітня/апріля 2022 р.

При ґміні треба правильно паркувати

Уряд Ґміны Санкова апелює до вшыткых змоторизуваных правильно паркувати в околицях Уряду Ґміны. Іде головні о лишаня переізду для поіздів протиогньовой стражы, котрой реміза містит ся в сусідстві. Апель тыкат тіж незаставляня доізду до гыдранту, якій находит ся зараз при будинку. Відоміст до шоферів явила ся по тым, як стражакы з Охотничой Протиогньовой Стражы пару разів зголошували проблемы з доіздом до ремізы, в тым цілковиту неможніст доіхати до місця ґаражуваня і дополняня воды. Апель тыкат не лем блокуваня самого доізду, але і того, жебы взяти до увагы, што лишене місце мусит быти одповідньо шырокє з огляду на розміры авт, якыма диспонує Охотнича Протиогньова Страж в Санковій.

Ремонт ледовой галі в Креници

Крениця має уж заґарантуваны грошы на ремонт ледовой галі, де о медалі будут змагати ся джудисты, каратекы і тайскы боксеры в рамках орґанізуваных гын о рік Европейскых Ігр. Курорт достал промесу з Міністерства Фінансів, а того тыжня має быти підписане догваріня медже урядом а ґміном. На модернізацию обєкту Крениця має достати разом 17 млн 900 тис. зл. Бургомайстер Крениці Пьотр Рыба подал, што Европейскы Ігры то велика фінансово-економічна шанса для міста, як тіж можливіст поправы іміджу курорту. Місто зголосило тіж запотрібуваня на будову двох запоровых паркінґів, модернізацию доріг докола галі і ремонт алейок на Паркову Гору, де будут проходити змаганя в гірскых бігах і колярстві МТБ. Грошы на вымінены ремонты мают походити з проґраму Польскій Лад. Власти курорту ждут на остаточне рішыня уряду влады.

Книжка о социяльным положыню на Підкарпатю

На русиньскым выдавничым рынку явила ся нова публикация. То книжка пн. «Господарскій і социяльный розвиток Підкарпатской Руси 1919-1939», авторства Юрая Жаданьского, котру печатало Здружыня Інтеліґенциі Русинів Словациі. Близко 200-страницьова публикация є моноґрафійом, в котрій автор занимат ся проблематиком господарского і социяльного розвитку найбарже на схід положеной части меджевоєнной Чехословациі. Темы розвитку промыслу, домашньой продукциі, рынковых односин, земледільства і лісного господарства, як і з тым повязаного социяльного розвитку Жданьскый представлят в контексті намагань творіня єднотного чехословацкого рынкового господарства на Підкарпатскій Руси. Нова публикация є збогачена фотоґраґічном частю, о котру постарал ся Владимір Куштєк, якому Здружыня Інтеліґенциі Русинів Словациі выдало першый і другій том публикациі пн. «Чехословацкій світ в Карпатах».

Робота в Ропі – аплікуйте

Війт Ґміны Ропа оголосил набір на становиско Боцмана Водной Станиці та ратівників на ґмінным купалиску на резервуарі Климківка на літній сезон 2022. Ґміна плянує наняти єдного боцмана і двох ратівників, в терміні од 15. червця/юнія до 15. вересня/септембра в примірі боцмана і од 1. липця/юлия до кінця серпня/авґуста в примірі ратівників. Умовы роботы і заплаты сут до догваріня, а список конечных дозволінь і документів стараня ся о вымінены становиска доступный єст на сайті уряду ґміны. Термін складаня оферт то одповідньо 31. мая та 15. червця/юнія тр.