Сумар дня на 13. липця/юлия 2022 р.

Приносиме вам сумар медияльной ґрупы ЛЕМ.фм+ на ден 13. липця/юлия 2022 р.

Лемкы традицийні пішли на св. Гору Явір

Вчера, 12. липця/юлия, в праздник свв. Апостолів Петра і Павла, православны Лемкы зобрали ся на св. Горі Явір на святочны богослужыня. Свято попередило XXXII Православне Поломництво на Святу Гору Явір орґанізуване Братством Православной Молодежы Перемышльско-Ґорлицкой Єпархіі. Поломникы рушыли в неділю, 10. липця/юлия, зо Святковы Великой. В тот ден были служены молебні в Грабі – в місци каплиці, де служыл православны Літургіі в 1911 р. св. Максим Ґорлицкій, і в Чарным, на місци памятника з 1934 р. поставленого в чест поворотів Лемків до Православя. Окрем того поломникы перешли села Долгє, Ясюнку, Криву, Ґладышів, Реґєтів, Ганчову, де была служена Всеночна, і Высову, одкале поломникы вышли на св. Гору Явір. Там служена была Свята Літургія і посвяченый крест, якій внесли на Гору поломникы.

В Польковицях памятнили Волыньску Траґедию

11. липця/юлия празднуваный был Нацийональный Ден Памяти Жертв Ґеноциду вчыненого украіньскыма нацийоналистами на громадянах ІІ Польской Республикы. Стоваришыня Патріотичны Польковиці зорґанізували торжества на обшыри Місця Памяти Поляків Ґольґоты Сходу. Лукаш Пузнєцкій, бургомайстер Польковиц, в своій перемові привюл цитуваня, што жертвы не кличут о помсту, лем о памят, і што в упамятнінях Волыньской Траґедиі іде о памят о замордуваных особах, жытелях коло 150 сел в володимірскым, горохівскым, ковельскым і луцкым повітах. Вчас торжества м.ін. одспівали польску гымну, одчытали Апель Памяти, помолили ся. Ведучый Стоваришыня Патріотичны Польковиці Войцєх Феріх в підсумуваню повіл, што глядаючы притулку в Польщы, украіньскы матери з дітми, як амбасадоры украіньской землі, зачынают тепер лішый розділ медже польском і украіньском нациями.

Владимір Противняк оціненый

2. липця/юлия на футбольовым стадийоні в Меджелабірцях одсвяткували 100 років орґанізуваного футболю в місті. По выникнутю Чехословацкой Республикы в 1918 році зачали ся орґанізувати першы футбольовы змаганя в Меджелабірцях. Офіцияльно меджелабірскій футбольовый клюб был основаный в 1922 році. Святкуваня сотной річниці одкрыл пріматор міста Владислав Вышньовскій. Дале выступили і далшы цінны гості, представникы власти і особы звязаны з футбольом. Пак оціненых было 68 осіб, котры активно діяли в меджелабірскым футбольовым клюбі. Медже оціненыма был і бывшый председа Русиньской Оброды на Словациі, долгорічный секретар Світового Конґресу Русинів Владимір Противняк. Окрем інчого є він і спортовым активістом, і в роках 1991 аж 1995 был председом клюбу ТЄ Спартак Меджелабірці.

Выремонтуют воєнны цмонтері в Ропици, Бортным, Рыхвалді, Санковій, Мацині і Вапенным

Ґміна Санкова вєдно зо словацкым партнером, ґміном Нижня Полянка, реализуют проєкт пн. Реновация некрополий з періоду І світовой войны, якій фінансуваный єст з середків Европейского Фундушу Реґіонального Розвитку в рамках Проґраму Трансграничной Спілпрацы Interreg VA PLSK 2014-2020. Кошт ремонтовых робіт выносит близко 4 млн зл, а згідні з гармоноґрамом будут они скінчены до грудня/децембра тр. Реновация обнимат воєнны цмонтері в Ропици, Бортным, Рыхвалді, Санковій, Мацині і Вапенным. Цілю трансграничного проєкту є забезпечыти одповідню охорону та розвинути головный потенциял обшыри погранича.