Сумар дня на 13. липця/юлия 2023 р.

Приносиме вам сумар медияльной ґрупы ЛЕМ.фм+ на ден 13. липця/юлия 2023 р.

Ластівочка одобрала нагороду ім. Кольберґа

Вчера, 12. липця/юлия Лемківскій Ансамбль Пісні і Танця «Ластівочка» одобрал на Королівскым Граді в Варшаві престіжову нагороду ім. Оскара Кольберґа. Нагороду на рукы членів ансамблю передал Міністер Культуры і Нацийональной Спадковины Пьотр Ґліньскій. Разом з колективом участ в подіі брал заступця Головного Заряду Стоваришыня Лемків і заєдно ведучый Кружка Стоваришыня Лемків в Пшемкові, при котрым діє ансамбль, Євген Габура. З лемківском ґрупом до Варшавы поіхал і віцестароста польковицкого повіту Ян Войтович, якій на горячо по ґали переданя нагороды написал на своім фейсбуковым фанпейжды, што «то гордіст мочы быти днес з Вами», а дале додал, што польковицкій повіт має такы перлины, котрыма може гордити ся перед цілом Польщом. І мы ґратулюєме лемківскій Ластівочці!

Стипендийный Фонд ім. Івана Русенка

Товариство для Розвитку Музею Лемківской Культуры оголосило рекрутацию до другой едициі стипендий Лемківского Стипендийного Фонду ім. Івана Русенка. Жебы старати ся о таку стипендию, треба быти тогорічным матуристом, найти ся на списку принятых на студиі єдной з публичных высшых шкіл – університетів, політехнік ітп. в Польщы, і сполнити пару додаковых вымогів. Стипендия выносит 700 зл місячні через цілый І рік студиюваня, комплет документів треба зложыти до 9. серпня/авґуста 2023 р. Цілю Лемківского Стипендийного Фонду ім. Івана Русенка є фінансово підперти здібных Лемків і пропаґувати доробок Івана Русенка серед лемківской молодежы. Полну інформацию про вшыткы вымогы і потрібны до зложыня документы найдете на сайті zyndranowa.org та на нашым портали. Перша едиция ступендийного фонду была влони.

Згоріл пристанок на Баницкым Вершку

В ґорлицкым повіті згоріл деревяный пристанок. Стало ся то на Баницкым Вершку, на крижівці медже Панкном а Кривом (Баницьом). В середу, 11. липця/юлия пожарникы Охотничой Протиогньовой Стражы были закликаны до пожару автобусового пристану. Як видно на знимках, котры реляцийонуют акцию, пристанок такой в цілости згоріл. Покля што не знатя, яка была причына пожару. Надієме ся, што деревяный пристанок буде одбудуваный.

Выгорятскій Музей просит на літні подіі

Выгорлятскій Музей в Гуменным во спілпраци з лекторами ремесельных традиций реґіону выжнього Земплина позывают вчас того літа до ареалу Експозициі Народной Архітектуры і Бываня (скансену) Выгорлятского Музею в Гуменным. Музей і в тым році продолжує літній проґрам ремесельно-фольклорного циклю традицийных ремесельных варштатів і проґраму пн. «Ожывлены ремесла – Творчы і освітні подіі 4». Ремесельны варштаты, тематичны выставы і товаришучый проґрам будут проходити в ареалі скансену вчас штырьох неділь од 16. липця/юлия до 27. серпня/авґуста. Подіі будут проходити в природным оточыню скансену, котрый є збудуваный як село з початку ХХ ст. В рамках варштатів буде мож познати роботу корытарів, гончарів, роботу з полотном і кроснами ци ковальску професию.