Сумар дня на 13. лютого/фебруара 2023 р.

Приносиме вам сумар медияльной ґрупы ЛЕМ.фм+ на ден 13. лютого/фебруара 2023 р.

«Капличкы Малопольщы» 2023

Рушыла чергова едиция конкурсу «Капличкы Малопольщы». Єст він направленый на єдиниці територияльного самоуряду з малопольского воєвідства, котры піднимают консерваторскы, реставраторскы або будівляны працы при памятковых капличках находячых ся в Малопольщы. В тым році Самоурад Малопольского Воєвідства передаст на тоту ціль 700 тис. злотых. Цілю конкурсу єст захованя для будучых поколінь вартістных обєктів, будучых важным елементом культуровой дідовизны Малопольщы. Обєкты не мусят быти в воєвідскым ци ґмінным списку забытків, повинны лем мати артистичну і історичну вартіст. Максимальна квота дофінансуваня то 40 тис. злотых і не веце як 60% коштів реализациі цілости прац. Внескы мож складати до 10. марця тр. В минулых едициях конкурсу повело ся одновити понад 620 обєктів, за суму понад 5,5 млн злотых.

Мукачівска грекокатолицка єпархія хоче приняти григорияньскій календар

В минулым тыжни інформували сме, што Украіньска Грекокатолицка Церков на Украіні і в Польщы приняли рішыня перейти на тзв. новоюлияньскій календар. Русиньска Мукачівска грекокатолицка єпархія, яка не належыт під Украіньску Грекокатолицку Церков, рішат о переході на новый календар сама. Мукачівска єпархія хоче приняти од 1. вересня/септембра не новоюлияньскій, але григорияньскій календар, значыт включно з Пасхалиями. Деталі были бесідуваны на стрічы з деканами 10. лютого/фебруара. Перехід на новый календар в Мукачівскій єпархіі буде дальше рішеный голосуваньом в поєдных парохіях. Кєд векшына даной громады не буде за переходом, парохія затля остане при староюлияньскым календарі. Більше на тоту тему чытайте в дописі на нашым портали.

Aкадемія з нагоды ювілею 100. уродин Юрия Новосільского в Кракові

Краківска Православна Парохія, Центр Сакральной Штукы ім. Юрия Новосільского і Музей Ікон в Варшаві просят на торжественну академію з нагоды ювілею 100. уродин Юрия Новосільского, якому є посвяченый 2023 рік. Подія пройде уж в тоту неділю, 19. лютого/фебруара о 17.00 год. в будинку краківской православной парохіі. Одбудут ся презентация альбому Кристины Черні пн. «Новосільскій в Варшаві і на Мазовшы. Сакральна Штука» і концерт церковной музикы. Подіі буде товаришыла выстава «Сакральны проєкты Юрия Новосільского» з колекций Фундациі Новосільскых/Ґалериі Стармах і Краківской Православной Парохіі. Вечер завершыт дебата посвячена літургічній мысли Новосільского, в якій возмут участ м.ін. єпископ лодзіньско-познаньскій Афанасий, о. Генрик Папроцкій, імость Мария Папроцка, Кристина Черні і Анджей Стармах.

«Малопольска Пчола» 2023

До 3. марця тр. приниманы сут зголошыня в VIII едициі конкурсу «Малопольска Пчола». Конкурс є направленый на позаурядовы орґанізациі і стоваришыня діючы в обшыри еколоґіі і охороны звірят та охороны природничой дідовизны. В його рамках мож позыскати дофінансуваня на реализацию ріжного рода ініциятив з обшыри охороны біолоґічной ріжнорідности медодайных пчіл, дикых запыляючых овадів і рослин, на едукацийны діяня про жытелів Малопольщы ци проєкты промуючы пчолярство. До конкурсу мож складати оферты на реализацию задач, якы ся зачнут не скорше як 8. мая і скінчат не пізнійше як 30. листопада/новембра тр. На реализацию задач выбраных в конкурсі буде переданых разом 450 тис. злотых.