Сумар дня на 13. серпня/авґуста 2026 р.

Приносиме вам сумар медияльной ґрупы ЛЕМ.фм+ на ден 13. серпня/авґуста 2026 р.

Діяня «Каменярів Кычеры»

Од 20. до 25. липця/юлия на цмонтери в Ґладышові проходил другій етап ремонтово-порядковых робіт, веденых в рамках акциі «Каменяре Кычеры», орґанізуваной Лемківскым Ансамбльом Пісні і Танця «Кычера» з Ліґниці. Были то інтенсивны дни спільной працы, підчас котрых волонтеры порядкували терен і занимали ся роботами при захованых лемківскых крестах. Влони были уж ведены роботы на тым цмонтери. Орґанізаторы акциі інформуют, што іщы того рока – в вересни/септембрі, плянуют вернути до Ґладышова, жебы продолжати роботы. Хто охочый – мож долучыти.

Поломництво Копальників на Гору Грабарку

Як інформує православна парохія Святой Тройці в Любіні, мож ся уж записувати до участи в другым поломництві копальників на Святу Гору Ґрабарку. Поломництво нижньошлезскых копальників обуде ся в серпни/авґусті – на праздник Преображыня Господнього, з благословліня владыкы Юрия, архієпископа вроцлавско-щеціньской єпархіі Польской Автокефальной Православной Церкви. Владыка Юрий призначыл якісый час тому капеляна для копальників, якым єст о. прот. Богдан Репела, любіньскій парох. Поломничество своім патронатом обняла компанія KGHM. Одбуде ся оно в днях од 17. до 19. серпня/авґуста. Деталі найдете на сайті любіньской парохіі.

Фінісаж выставы Працовні «Мандиліон»

Припоминаме, што іщы лем до заране, 14. серпня/авґуста, в Ґалериі Bielanka73 в Білянці мож видіти выставу Працовні Ікон «Мандиліон». На выставі сут презентуваны іконы авторства Лідиi Трохановской-Пеляк, Анны Трохановской і Мирослава Трохановского. Працовня «Мандиліон» діє од понад 25 років і творит іконы, навязуючы до традициі карпатского іконопису. Вернісаж выставы был 16. липця/юлия. Творці правоцні окрем ікон творят тіж більшы проєкты – такы як іконостасы ци розписы храмів.

«Музика Заклята в Деревi»

В днях 26.–30. серпня/авґуста в забытковых деревяных обєктах Низкого і Сандецкого Бескідів одбуде ся фестіваль «Музика Заклята в Деревi». Концерты будут орґанізуваны м.ін. в церквах в Квятони і Верхомли Великій, в Мазярскій Загороді в Лоси, при костелі в Санковій та в амфітеатрі в Высовій. В проґрамі подіі нашли ся артисты, якы репрезентуют ріжны музичны ґатункы – од музикы інспіруваной традицийом Карпат і фольклором по сучасну альтернативну музику і поп. Фестіваль отворит Вернигора, а підчас дальшых дни выступлят м.ін. Войтек Шуманьскiй, Туля і VOŁOSI. Подіі товаришыти будут тіж варштаты ремесла, презентациі реґіональных страв, деґустациі локальных продуктів і зiля. Кажда з подій має быти нагодом, жебы познати выняткове дідитцтво Шляку Деревяной Архітектуры в Малопольщы. Вшыткы концерты сут безплатны.