Сумар дня на 13. вересня/септембра 2023 р.

Приносиме вам сумар медияльной ґрупы ЛЕМ.фм+ на ден 13. вересня/септембра 2023 р.

Місце для розвитку бізнесу в Ґорлицях

Перед тыжньом, 5. вересня/септембра, в будинку ґорлицкого «Сокола» прошла інформацийня стріча пн. «Інвестуй, розвивай і не плат податку в Польскій Зоні Інвестиций», зрыхтувана Краківскым Технолоґічным Парком і Містом Ґорлиці. Вчас подіі была запрезентувана Зона Господарчой Активности, што повстає при ул. Заколе в Ґорлицях. Місто на будову реченой зоны диспонувало середками з Реґіонального Операцийного Проґраму Малопольского Воєвідства на рокы 2014-2020. Оголошены были уж устны конкурсы оферт на продаж ґрунтів в Зоні. Інвесторы і підприємці можут рахувати на звільніня з податку од нерухомости на обшыри Міста Ґорлиці в рамках помочы de minimis. На вітірковій стрічы прошли дискусийны панелі м.ін. услугы Centrum Business in Małopolska для підприємців, Польской Інвестицийной Зоны та Зоны Господарчой Активности в Ґорлицях. Тоту послідню запрезентувал Заступник Бургомайстра Міста Ґорлиці, Лукаш Балаєвич.

Буде новый-старый дворец

Тырват ремонт желізничного дворця в Команчы. Буде мал не лем новый вид, але і додатковы функциі, попри тій основній, як місце для пасажырів, бо штрека номер 107 зас є хоснувана. Желізнична ленія Лупків-Нове Загіря з ХІХ ст. было частю Першой Угорско-Ґаліцийской Желізниці. До хоснуваня оддали єй в 1872 році, а о два рокы скінчыли будову тунелю Лупків-Полата, завдяку чому мож было через Лемковину подорожувати аж до Будапешту. Власти Команчы хотят, жебы в одремонтуваным будинку дворця нашла ся ізба артефактів з часів І світовой войны, своє місце найти має гын ґмінный осередок культуры, ґмінна бібліотека, а і пункт туристичной інформациі. Комплексовый ремонт дворця робленый є завдякы спілфінансуваню з проґраму Польскій Лад (60% коштів – решту покрыват Ґміна). Згідні з пляном будинок оддадут до хоснуваня початком будучого рока.

Книжка русиньского автора доцінена

Вчера в просторах Крайской Бібліотекы в Пряшові одбыло ся торжественне оголошыня результатів шестой едициі чытальничого конкурсу Книга Рока ПСК 2022. Нагороды были признаны на основі оціны професийного жырі в штырьох катеґориях: Белетристика для діти і молодежы, Белетристика для дорослых, Наукова література та Популярно-Наукова література. Серед нагородженых книжок нашла ся публикация пн. Орест Сабов – О угорьскых Русах (Русины) в перекладі і історичным коментарі, якой едитортами сут Лідия Будайова, Петер Будай і Петер Шворц. Книжка здобыла другє місце в катеґориі Наукова література. Нагороду одобрал Марек Гребік, предсідатель орґанізациі молоды.Русины, завдякы котрій публикацию выдали в минулым році во спілпрацы з выдавництвом Universum. Нагороджена книжка є перекладом «A magyar oroszokról (Ruthének)» [чыт А МАДЗЯР ОРОСОКРЫЛЬ РУТЕНЕК] авторства русиньского інтелектуалисты, міністерияльного урядника з часів Австро-Угорской Монархіі др. Ореста Сабова. Ориґінал вышол в 1913 році.

Зголос ся до проєкту і одбер резервуар на воду

Ґміна Санкова во спілпрацы зо Звязком Ґмін Басену Вислокы реализуют проєкт пн. «Реализация інвестиций в обшыри зелено-синьой інфраструктуры на терені ґмін належачых до Звязку Ґмін Басену Вислокы». В рамках того проєкту мож зголошувати ся до участи в ним і отриманя дофінансуваня на монтаж резервуарів до збераня дощовой воды. В рамках задачы плянуют довезти і замонтувати комплет, што складат ся з резервуару на 650 літор разом з елементами до прилучыня і розпространіня зобраной дощовой воды – помпом, шляухом, прыскачом.