Сумар дня на 14. червця/юнія 2022 р.

Приносиме вам сумар медияльной ґрупы ЛЕМ.фм+ на ден 14. червця/юнія 2022 р.

«Етноварштаты в Лопянці» до Бєщадского села вернут стары традициі

Карпатскє Товариство отримало дофінансуваня з конкурсу ЕтноПольща 2022 на реализацию задачы «Етноварштаты в Лопянці». Проєкт має на ціли ратувати материяльну і духову спадковину творену на обшыри Бєщадів од віків прожываючыма там Поляками, Лемками, Бойками і Жыдами. Варштаты направлены сут на локальну соспільніст і пройдут в 8 катеґориях, м.ін. такых як ковальство, каменярство, музика ци танец. Подія поділена єст на дві части – перша для дорослых, а друга для діти з ґмін Тисна, Балигород і Солина. Перша част пройде в червци/юнію і обнимала буде лем каменярскы варштаты. Друга част проєкту зачне ся в вересни/септембрі і обнимала буде решту доступных варштатів. Участ в варштатах дармо.

Фестіваль «Світ під Кычером» вертат до традицийной формы

Орґанізаторы фестівалю «Світ під Кычером» поінформували, што тогорічна 25. едиция подіі пройде в традицийній формі, нажыво і з публиком. «Світ під Кычером» то єден з найбільшых фольковых медженародных фестівалів. В проґрамі подіі находят ся выступы 14 ансамблів, в тым м.ін. з Панами, Чіле, Мексику, Украіны і Польщы. Фестіваль зачне ся 1. липця/юлия і пройде в селах находячых ся на Нижнім Шлеску і Любушскій Земли. Зато же єст то ювілейна едиция подіі, 4. липця/юлия на ліґницкым рынку одбуде ся торжественна ґаля, в часі котрой орґанізаторы фестівалю отримают цертифікат FIDAF – федерациі, котра лучыт найбарже престіжны фольковы фестівалі на світі. Дрібниці што до проґраму акциі находят ся на офіцийным сайті подіі.

Нова культуральна подія в Устю Рускым

Театральна ґрупа Племя ведена Моніком Бабульом і Ґмінный Осередок Культуры в Устю Рускым просят 23. червця/юнія, в першый ден літа на одкрытя нового культурального місця в Устю Рускым – «Сцены під Деревом». Як перша выступит на ній Аґнєшка Пшепіорска Франкєвич зо свойом монодрамом, а пак ґрупа Племя просит на спільну «Собітку». Подія зачне ся о год. 20.00, а же єст в пленері, то орґанізаторы просят забрати зо собом коцы і каріматы.

Выстава о Погірю і Лемковині

Іщы лем тыжден в сандецкым скансені мож обзерати выставу пн. «Промысел і народне ремесло на обшыри Погіря і Лемковины». Подія реализувана єст Музейом Дворы Карвациянів і Ґладышів – одділіня Скансен Погіряньского Села в Шымбарку. Выстава проходит в рамках проєкту пн. «Skansenova – системова опіка над спадковином в малопольскых музеях під одкрытым небом». Експозиция презентує так сучасны, як і архівальны фотоґрафіі, што представляют ремісників, але тіж обєкты репрезентуючы сельскій промысел обшыри Погіря і Лемковины. Знимкы походят зо збіркы Музею Дворы Карвациянів і Ґладышів і з Реґіонального Музею в Яслі. Выставу мож обзерати до 19. червця/юнія.

Вернісаж выставы «Никыфор, малярство»

Припоминаме, же днес, 14. червця/юнія, о 17.00 год. в Пєніньскым Музею, якій ся находит в Шляхтовій при ул. Лемківскій 37, одбуде ся вернісаж выставы образів Никыфора, Епіфана Дровняка, пн. «Никыфор, малярство». Як інформує музей, выставу творів вызначного лемківского маляря-примітивісты буде мож там обзерати до кінця серпня/авґуста того рока.