Сумар дня на 14. грудня/децембра 2021 р.

Приносиме вам сумар медияльной ґрупы ЛЕМ.фм+ на ден 14. грудня/децембра 2021 р.

Новы пандемічны рестрикциі

Од заране в Польщы будут обовязувати новы пандемічны ограничыня. Введіня новых рестрикций заповіл на пресовій конференциі 7. грудня/децембра міністер здоровля Адам Нєдзєльскій. Тоты, котры приняли вакцину, мают быти вылучены з ограничынь. Од середы 15. грудня/децембра, змінят ся ліміты тых, котры можут корыстати з ґастрономічных локалів, готелів, кін, концертів ци басенів. Ліміт осіб буде зменшеный з 50 до 30% і в місцях реліґійного культу. Закрыты будут клюбы і дискотекы. Так само заран введеный буде ліміт 75% заполніня в публичным транспорті. Од наступного понеділька, 20. грудня/децембра, верне і вчыня на дистанс в основных і середніх школах. Такій стан потырват до 9. січня/януара 2022 р. Додатково, од 1. марця будучого рока має быти введеный обовязок вакцинациі для выбраных ґруп працівників – медиків, учытелів і мундуровых служб.

В Креници побудуют підземный перехід

Од середы, 22. грудня/децембра, закрытый буде пeрехід для пішых при ронді в центрі Крениці. Коркы од років являют ся великым проблемом в центрі курорту. В літнім і зимовым сезоні творит ся там затор долгости аж і 5 км. Винный тому має быти реченый перехід. Жытелі, водителі авт і містны радны інтервеніювали в тій справі до Воєвідского Заряду Доріг. Тепер представникы локальных самоурядів разом з зарядом доріг і маршалком рішыли, же в тым місци побудуваный буде тунель. Ситуация руху в Креници была уж вступно проанализувана, тепер зрыхтувана буде специялистична експертиза. На тоту хвилю введены будут тымчасовы зміны руху. Перехід для пішых на ул. Здройовій має быти закрытый до кінця лютого/фебруара будучого рока. При ронді дале одкрыты будут в тым часі два інчы переходы. Готова єст уж симуляция коштів выбудуваня в тым місци підземного переходу – мало бы то быти не веце як 3 мілийоны злотых.

Возникат шляк для сліпых і слабовидячых осіб в Низкым Бескіді

В Низкым Бескіді в околицях Ольхівця в ґміні Дукля возникат туристичный шляк для сліпых і слабовидячых осіб. Проєкт пн. «Видіти Низкій Бескід. Туристична стежка з авдийодескрипцийом» єст реализуваный працівниками бещадской ґрупы Гірской Охотничой Ратівничой Службы GOPR, при схоснуваню середків з маршалківского уряду. На стежці найде ся специяльне ґратя, котре разом з дедикуваном мобільном аплікацийом не лем направлят сліпого або слабовидячого туристу, але і приближат історию, природу, культуру той части Низкого Бескіду і представлят інтересуючы інформациі з ньом звязаны. То першый того рода гірскій пут на Підкарпатю і єден з першых в Польщы. Має быти готовый іщы в тым році.

Концерт Серенчы в Домініковицях

В тоту неділю, 19. грудня/децембра, о 19.00 год. в будинку Сельского Дому Культуры в Домініковицях одбуде ся концерт лемківского фолькового ансамблю Серенча. Музикы выступлят з проґрамом пн. «Творча інтерпретация традициі – слідами Оскара Кольберґа». Орґанізатором подіі єст Стоваришыня Промоциі Лемківской Творчости «Серенча». Вступне дармо, але жебы взяти участ в концерті, треба перше зарезервувати сой місце. Концерт буде трансмітуваный онляйн, на вебсайті Gorlice.tv та на фейсбуковым профіли ансамблю Серенча.