Сумар дня на 14. листопада/новембра 2022 р.

Приносиме вам сумар медияльной ґрупы ЛЕМ.фм+ на ден 14. листопада/новембра 2022 р.

Атак активісток на образы Енді Варголя

Дві молоды дівчыны, активісткы, што протестуют проти дотациям на копальні палива, прібували приклиіти ся до образів зо славной сериі «Поливок Campbell’s» Енді Варголя в Нацийональній Ґалериі Австралиі. То уж черговый атак активістів на творы штукы. Іх цілю были уж образы Кльода Монета, Вінцента ван Ґоґа і Йоганеса Вермера. Перед приклиіньом активісткы замазали Варгольовы образы синьом фарбом в спрею. Щестливі творы не были знищены, кєд же сут за шыбом. Охорона выпровадила активісткы з музею нич клий, котрым приклиіли ся до образів, встигнул засохнути. Поліция потвердила інтервенцию в ґалериі, але передала, што никого в тій справі не арештували. Подля заанґажуваной в протест Боні Касен, Варголь в культовій сериі образів представил розшалілый консумпцийонізм. Ґрупа Stop Fossil Fuel Subsidies поінформувала в освідчыню, што хоче, жебы австралийскій уряд закінчыл підперати нафтовый, ґазовый і угльовый промысел. Додали, што сут частю цілосвітовой сіти руху цивільного опору знаного як А22.

Завершены дороговы інвестициі в Фолюшы

В минулу середу, 9. листопада/новембра, одданый до хоснуваня был паркінґ з перебудуваном дорогом в Фолюшы. Цілковитый кошт інвестициі то понад 400 тис. злотых, з чого більше як 300 тис. походило з Урядового Фонду Локальных інвестиций, а неціле 100 з буджету ґміны Дубовец. Є то чергова, а при тым послідня заплянувана на тот рік в Фолюшы інвестиция. В рамках тогорічных інвестиций, якых вартіст перешла 1,65 млн злотых, зроблены были перебудовы і ремонты доріг, ремонт мосту і будова паркінґу. Неодолга завершена буде проєктова документация перебудовы центру Фолюша, де являт ся додатковы паркінґовы і рекреацийны зоны.

Фестіваль Літературы для Діти уж в тым тыжни

Од середы, 16. листопада/новембра, в Кракові проходил буде Фестіваль Літературы для Діти. В рамках подіі признавана є Нагорода ім. Фердинанда Вспанялого за найліпшу книжку для діти за минулый рік. Серед пятьох номінуваных в тым році до нагороды нашла ся книжка «Бескід без кіту. Зима» авторства Мариі Стшелецкой. Місце акциі книжкы то зимова Лемковина в двадцетых роках ХХ столітя. Прочытаме в ній о дівчатках, котры в самій середині тяжкой зимы глядают свого вітця – каменяря, што не вернул домів перед Різдвом. Фоном для акциі книжкы сут дика природа Бескіду і штоденне жытя лемківкого села. Вердикт оголосят на закінчыня фестівалю – 20. листопада/новембра. Ґали товаришыл буде спектакль «Бескід без кіту» в режысериі Монікы Бабулі і Мариі Стшелецкой на мотивах книжкы, котра выграла в конкурсі перед двома роками, під такым самым наголовком.

ПУЛьС просит на премєру представліня «Руб і лице»

Єдиный в світі професийный русиньскій ансамбль ПУЛьС просит на премєру, яка ся одбуде в неділю 18. грудня/децембра в Театрі Йонаша Заборского в Пряшові. «Руб і лице» то погляды до істориі Русинів в трьох ріжных періодах і містах. Як мож чытати в описі представліня, ансамбль пересене нас до замку Любовня од славных часів вчасной новожытности по неславны і тяжкы часы в рамках Австро-Мадяр. Пак контрасты социяльных кляс ХХ столітя вкажут традицийне гуцульскє весіля і нетрадицийне вельокультурове весіля в Ужгороді в меджевоєнным періоді. Буде і навязаня до сучасности, з задуманьом над нашым вкладом в сучасну історию.