Сумар дня на 14. мая 2020 р.
Приносиме вам сумар медияльной ґрупы ЛЕМ.фм+ на ден 14. мая 2020 р.
Музей Лемківской Культуры в Зындрановій одкрытый наново
Як інформує Музей Лемківской Культуры в Зындановій, в звязку зо знесіньом урядом польской влады од 4. мая деякых ограничынь тыкаючых принципів безпекы звязаной з пандемійом коронавіруса, зас єст він одкрытый для одвиджаючых. Музей забезпечыл вымаганы середкы особистой охороны, прото тіж офіцияльно од минулой суботы, 9. мая, музейны просторы зас сут отворены. Музейне Товариство інформує заєдно і о дальшых ограничынях, котрых мусят дотримувати туристы. Музей в Зындрановій покля што буде одкрытый од вітірка до неділі, медже 10.00 а 16.00 год. В понедількы буде закрытый. До музею буде мож войти лем в охоронных масочках і при захованю безпечного дистансу. Істнує лем можливіст індивідуального обзераня. В часі пандеміі не будут орґанізуваны ниякы едукацийны занятя, ани проєкция фільмів. Окрем того, подібні як в примірі храмів, обовязує принцип, што на обшыри 15 квадратных метрів не може быти веце як 1 особа.
Інформация про коронавіруса тіж по руснацкы
Словация продолжат пошырюваня двоязычности, жебы в тот спосіб были выполняны права нацийональных меншын і могли они хоснувати і быти інформуваны в своім рідным языку в рамках урядового контакту. Ласло Буковскій – полномічный про нацийональны і етнічны меншыны, котрый был выбраный за попереднього уряду на Словациі, не был дотля одкликаный з фукнциі і продолжат свою роботу. Реаґує як раз на ситуацию коло пандеміі коронавіруса, што вказало ся і на сайті полномічного. Першый раз в істориі Словациі ріжны інституциі і Уряд полномічного влады споіли ся і вытворили пят меншыновых мутаций центрального вебсайту korona.gov.sk. Тот сайт приносит основны інформациі окрем словацкого і анґлицкого языка і в мадярскым, ромскым, русиньскым, украіньскым і німецкым языках. Хоц в Словацкій Республиці є вызнаных 13 нацийональных меншын, лем тых пят має хоц в єдным селі над 20% населіня і так мают они право на урядовуу комунікацию в материньскым языку.
Увага на охоронне подаваня вакцины лишкам
Малопольскій Воєвідскій Дохтор Ветеринариі інформує, што на обшыри малопольского воєвідства в днях од 18. мая до 7. червця/юнія буде ведене охоронне подаваня вакцины лишкам проти встеклині. Ветеринарі будут давати вакцину при помочы специяльных середків, котры будут або зошмарены з аеропляну, або принесены до ліса. Воєвідскій Дохтор Ветеринариі рекомендує, жебы в часі подаваня вакцины не выпущати псів і котів без опікы. Коли дішло бы до контакту нашой домашньой звірины з вакцином, треба одраз зголосити ся до наблизшого ветеринаря. Кєд дійде до контакту з вакцином треба поінформувати так само Повітову Санітарно-Епідемійолоґічну Стацию. Цілю безпечні провести процес подаваня вакцин, Малопольскій Воєвідскій Дохтор Ветеринариі просит вшыткых жытелів малопольского воєвідства, жебы достосували ся і дотримували рекомендаций. Ґорличане і жытелі околичных місцевости можут отримати більше телефонічных інформаций од Повітового Інспекторату Ветеринариі в Ґорлицях. Більше деталів находит ся тіж на сайті Уряду Міста Ґорлиці.
Краса Малопольщы – конкурс фотоґрафій
Малопольска Туристична Орґанізация просит взяти участ в конкурсі під назвом «Малопольща стартує!», в котрым головном нагородом єст рейс балоном. Принципы конкурсу сут барз просты. Старчыт зайти на фейсбуковый фанпейдж Малопольской Туристичной Орґанізациі і в коментари під конкурсовым постом додати знимку або ґрафіку, котра представлят креативну інтерпретацию тугы за Малопольщом, за єй туристичныма атракциями, памятками культуры, реґіональныма стравами ци жытелями. Треба дати фотку разом з гаштаґом #tęsknięzaMałopolską i #MałopolskaStartuje!. Конкурс тырват іщы днес до пілночы. Выграный буде проголошеный о два дни, 16. мая, в часі реляциі онляйн з «Віртуальной Інавґурациі Літнього Туристичного Сезону в Малопольщы» на сайті подіі о 19.00 год. Головном нагородом єст рейс балоном для єдной особы, орґанізуваный через Kraków Baloon Team на обшыри Малопольщы, якій мож зреалізувати до кінця 2020 р.
Повязаны дописы
Ґорлиці 106,6 MHz
