Сумар дня на 14. серпня/авґуста 2026 р.

Приносиме вам сумар медияльной ґрупы ЛЕМ.фм+ на ден 14. серпня/авґуста 2026 р.

26 млн злотых на ремонт доріг в Малопольщы

Веце як 26 млн злотых з Урядового Фонду Розвитку Доріг трафило до 15 малопольскых самоурядів. Догваріня были підписаны в минулый понедільок в Малопольскым Воєвідскым Уряді в Кракові. Середкы послужат до выремонтуваня в сумі 14 км доріг, в тым сусідуючых з Лемковином. Медже інчыма в ґорлицкым повіті перебудувана буде повітова дорога в Криґу, враз з будовом пішо-роверовой стежкы. На тоту ціль перезначено понад 4 млн злотых. Новосандецкій повіт отримал понад 2 млн злотых на розбудову ґмінной дорогы в Навойовій. Окрем того малопольскій воєвода підписал догваріня з 3 ґмінами, што отримают підпору на усуваня наслідств осувиск.

В Вапенным будуют лісове «мольо» в коронах дерев

В Вапенным – найменшым курорті в Польщы, появлят ся новы атракциі. Як інформувала війт ґміны Санкова Малґожата Малух, догваріня было уж підписане, а выконавця єст в терені. В курорті появлят ся м.ін. солянкова інгалятория, модерна фонтанна і лісове «мольо» в коронах дерев. Тота послідня атракция буде мала тіж шкляну видокову плятформу. Окрем того курортный парк буде розбудуваный о місця для діти і молодежы, пляцы забав і стежкы, а тіж місце до ґріля. Вшыткы роботы мают ся завершыти кінцьом будучого рока. На реализацию тых інвестиций ґміна отримала близко 10 млн злотых.

Беляньскій експрес буде на торах іщы місяц

Іщы лем місяц буде курсувал Беляньскій експрес, т.є. популярне черезграничне желизницьове получыня медже словацкыма Татрами і Мушыном по польскій страні. Потяг вертат на торы в часі літніх і зимовых вакаций. Беляньскій експрес в вікенды ходит двараз на ден зо стаций Попрад-Татры і Мушына. Затримує ся в Студеным Потоку, Кежмарку, Спишскій Білій, Подолинци, Старій Любовни і Плавчы. Словацкы туристы можут одвидіти Мушыну ци поблизку Креницю. Окрем того по польскій страні курсы потягу сут скорелюваны з розкладом перевозників, што курсуют з Мушыны до Кракова. На словацкым боці границі любителі істориі можут одвидіти наприклад памяткы в Кежмарку ци град в Старій Любовни, а любителі природы можут іти до Татр. Потяг рушат зо стациі Мушына о 10.00 і 18.00. З Попраду до Польщы іде о 7.29 і 15.29. В тым сезоні курсувал буде іщы до 13. вересня/септембра.

«Малопольща Карпаты OFFer 2026»

Од днес до неділі в Новым Санчы проходит 15. едиция Медженародного Мультiмедияльного Фестівалю Штукы – «Малопольща Карпаты OFFer 2026». Подія лучыт традицийну культуру Карпат з модерныма формами штукы, творячы простір стрічы фольклору з музиком, театром, танцьом, фільмом і візуальныма штуками. В проґрамі нашли ся концерты артистів, што інспіруют ся карпатском і етнічном музиком, театральны спектаклі, фільмовы показы, перформансы, варштаты та чысленны пленеровы подіі, што пройдут на рынку і улицях Нового Санча. Ідейом фестівалю єст вказувати богатство і ріжнороднiст карпатской культуры та будувати діалоґ медже традицийом а сучасністю. Орґанізаторы підкрисляют, што Карпаты OFFer то місце стрічы творців з ріжных держав реґіону Карпат, котры через штуку презентуют спільне дідицтво і його сучасны інтерпретациі.